Ora cu Mep papia di enseñansa ta solamente pa trece cosnan negativo dilanti. Esaki ta opinion di Parlamentario Kelly despues cu el a tuma nota cu lider di Mep atrobe ta papia tocante subsidio di schoolbestuur y cu lo no tin fondonan pa organisa diferente actividadnan. Na luga di duna un man y bin cu sugerencianan positivo nos por ripara cu lider di Mep y esnan rond di dje ta keda sembra negativismo ora ta trata enseñansa. Ta asina obvio cu e ta scohe pa netamente hunga politica cu situacionnan cu ta surgi y ta usa ken cu e por usa pa saca probecho politico.

Reunion entre Skoa cu Sindicato Simar

Despues cu Skoa cu Sindicato di Maestronan a reuni, a sali na cla cu tabatin varios mal interpretacionnan cu a tuma luga. E actividadnan cu scolnan di Skoa tabatin programa ta permanenece riba programa escolar y lo continua segun plan. Pa loke ta trata e subsidio di Gobierno, Skoa a resonsablisa su parti financiero na Ministerio di Enseñansa y na su turno Ministerio di Enseñansa ta den e proceso di cumpli cu su parti di acuerdo pa cu e schoolbestuur. Loke ainda Skoa y Ministerio di Enseñansa ta deliberando riba dje ta e normbedragen y Parlamentario Kelly ta spera cu lo por yega na un acuerdo mas pronto cu ta posibel.

No ta presenta na trabou pero ta sembra negativismo

Banda di no presenta na trabou ta parse cu Mep ta na soño tambe ora ta trata enseñansa, pasobra nos por a mira con lider di Mep di biaha ta bula den y cuminsa hasi comentarionan basa riba mal interpretacion y no ta busca informacion corecto. Nos tur por mira e cantidad di scolnan cu a wordo drecha y cu ta den reconstruccion of trabounan di reparacion cu ta tumando luga. Tambe nos por a mira e diferente programanan di profesionalisacion pa docente y cabesantenan y e reconocemento di maestronan cu a destaca. Pero tur esaki ta parse di no ta importante pa Mep. Nan ta prefera di bira cara wak otrobanda y no wak tur e desaroyonan positivo cu ta tumando luga den enseñansa.

Expresionnan haci den e articulo aki no necesariamente ta refleha opinion di ArenaPoliti.co