Parlamentario Jeffrey Kelly a compronde cu tin un preocupacion reinando bou di maestronan di scolnan secundario pa loke ta trata scohemento mas trempan di “vakkenpakket’ of “profiel” (materianan cu alumnonan lo bai examen cu ne). Durante un reunion dia 6 di Mei e aña aki den Parlamento, fraccion di AVP a presenta un mocion den cual ta urgi Minister di Enseñansa pa parkeer e decision di introduci esaki pa aña escolar 2015-2016,  hasi un investigacion profundo y reuni cu tur stakeholders prome cu bai over na un cambio. Dia 9 di juli Ministerio di enseñansa a manda un carta pa tur schoolbestuur den cual ta splica cu e cambio aki lo no bai na vigor durante e aña escolar actual y lo pospone e lessentabel pa minimo un aña.

Manera ta conoci, na Mavo tur alumno ta scohe nan vakkenpakket na final di 3e klas. E alumnonan lo pasa examen den e materianan aki y a base di e materianan cu e alumno a scohe e por dicidi ki tipo di enseñansa e lo bai sigui despues.

Synergie rapport

Den e asina yama “synergie rapport” a sali diferente consehonan y conclusionnan tocante enseñansa secundario aki na Aruba. Den e rapport aki a duna conseho pa alumnonan scohe nan “profiel” of “pakket” na final di Ciclo Basico 2 na luga di 3e klas Mavo. Un di e motibonan principal di e conseho aki ta basa riba estudionan hasi cu ta indica cu alumnonan ta haya nan mes confronta cu e peso di e materianan di 3e klas. Materianan manera Scheikunde, Natuurkunde y Biologie lo ta e materianan cu ta wordo considera mas pisa pa e alumnonan. Sa sosode cu alumnonan ta keda sinta den 2e klas y despues ta keda sinta den 3e klas of ta keda sinta dos biaha den 3e klas y consecuentemente ta hayanan obliga pa bai sea middag of avond mavo (dependiendo di nan edad).

E argumentonan

E cambio cu e rapport ta propone ta nifica cu e alumnonan ta drenta 3e klas cu un ‘profiel’ di materianan cu nan ta sinti nan mes mas comodo cu ne. E alumno por scohe entre e “profielnan” Mens en Maatschappij, Humaniora of Natuurwetenschappen. Nan ta keda cu e mesun profiel pa den examenklas pasa examen den e materianan aki. Cu esaki ta spera di amplia e posiblidad pa alumnonan termina nan Mavo cu exito.

E pregunta cu varios maestro ta hasi, ta cu si esaki no ta limita e desaroyo general di e mucha. Dor di scohe un profile mas trempan ta conduci cu e alumno no lo conoce e contenido di otro materianan profundamente. Por ehempel si e alumno scohe e profiel Natuurwetenschappen e lo no bai haya ni Aardrijkskunde ni Geschiedenis mas of si e scohe Humaniora e lo opta pa e cuatro idiomanan, Aardrijkskunde y Geschiedenis y den e caso aki lo no haya ningun di e “kunde vakken” mas. Esaki ta realmente loke nos kier?

Logicamente lo mester hasi cambionan cu ta na interes di nos muchanan. Parlamentario Kelly ta spera cu tur esnan envolucra den enseñansa por tin un imput den esaki. Pa cuminsa mester skucha e muchanan mes pa asina haya un idea di con nan ta wak e cambionan aki. Pero tambe mester skucha kico mayoria di e maestronan, cabesantenan y asta mayornan ta pensa prome cu e schoolbesturen hunto cu inspeccion di enseñansa y finalmente Ministerio di enseñansa bai tuma un decision.

Conclusion

Mester keda evalua a base di experiencianan di pasado kico no ta funciona den nos sistema di enseñansa y finalmente tin e curashi pa hasi cambionan cu ta na beneficio di nos muchanan. Pero e cambionan aki mester wordo implementa na un manera responsabel y carga pa mayoria den enseñansa pasobra finalmente ta e maestronan ta esnan cu lo mester bai carga e cambionan.

Expresionnan haci den e articulo aki no necesariamente ta refleha opinion di ArenaPoliti.co