Den e debate cu a tuma lugar den Parlamento siman pasa, un cos a resalta: e fraccion di AVP ta masha mal prepara. Nan no a prepara nan mes riba e topiconan di ensenjansa, y nan presentacionnan tabata masha pober. Tabata visto cu ta parlamentarionan di MEP tabata tin tur Documento, y hasta a comparti documento cu esnan di AVP. A pidi Minister pa duna tur documento, pero e minister no tabata kier.

Parlamentarionan a carece di mustra boluntad y determinacion pa soluciona problemanan cu mester di atencion urgente, pero a scohe pa pospone esaki, pa gobiero bai traha mas nota di maneho contra bullying y pa proteccion di docentenan.

Si di berdad e parlamentarionan di AVP ta para pa proteccion di docente, nan mester a vota pa e maestra di scol Kudawecha wordo re institui imediatamente, y pa e minister destrui su carta di 20 di maart, den cual na forma ilegal y inhusto a aplica no un, sino 4 medida disciplinario cumulativo riba e maestra. Pero na momento di vota pa e mocion ey, e parlamentarionan di AVP a mustra cu nan ta scohe pa laga e maestra cai, y scapa cara di e minister. Esaki ta mustra e cara berdadero di politiconan di AVP.

Hopi ta esnan cu a sigi e reunion te oranan laat di marduga, y por a mira e diferencia visto entre e fraccion di MEP bon prepara, y determina pa logra un solución, versus e fraccion di AVP tur bruha, mal prepara y hopi perdi.

Expresionnan haci den e articulo aki no necesariamente ta refleha opinion di ArenaPoliti.co