ORANJESTAD – E UNDP Center of Excellence cu base na Aruba ta un iniciativa di Nacionnan Uni, Gobierno di Aruba hunto cu Universidad di Aruba. E obhetivo principal ta pa crea un plataforma di interambio di informacion y experiencia riba proyectonan cu ta promove sostenibilidad di Small Island Development States (SIDS). Dos Arubiano ta  encarga cu e proyecto aki. Ta trata di Michael Granadillo y Francielle Lacle.

Tin hopi tema den e ramo di desaroyo di sostenibilidad. Na Aruba, por ehempel, tin iniciativanan andando y otronan cu ya a culmina; den tur caso tin un conocemento acumula hopi grandi. E ‘know how’ ey ta loke Nacionnan Uni ta haya masha importante pa comparti cu otro islanan.

SIDS ta basicamente un conhunto di islanan cu tin un cantidad di retonan djis paso nan ta isla. Aruba ya caba tin un caminda avansa hopi grandi den esey y experiencianan hopi positivo pa yuda otro islanan den nan propio procesonan di desaroyo.

E base aki ta loke Nacionnan Uni ta yama ‘South South Cooperation.’ Un concepto cu a evoluciona durante ultimo 15 aña. Granadillo a splica cu aunke cooperacion internacional tin hopi aña ta sosode y tin principionan di solidaridad entre paisnan, a detecta, ya pa algun aña, cu e proceso di adapta e conocemento ta un tiki complica. “E operacion tradicional (north-south) cu ta di un pais desaroya pa un pais den via di desaroyo, semper tin un handicap cu ta echt e adaptabilidad di e experticio ey.”

Nacionnan Uni a ripara algun aña atras cu si e proceso di intercambio di experiencia y conocemento ta bin for di un pais cu mas of menos tin mesun situacion, lo ta hopi mas posibel pa e haya 100% di adaptabilidad y nan por concreta e experiencia den e islanan.

E Center of Excellence ta un proceso cu ta bay tuma un par di luna y actualmente ta den e fase di planificacion. Tin cuater producto identifica den e proyecto y e ekipo di trabou ta trahando riba e planificacion y formacion di productonan.

Ta bay tin un plataforma virtual pa facilita e intercambio entre e 38 islanan miembro di UN SIDS. Tambe lo tin workshop tumando luga e prome siman den luna di september caminda lo trece delegadonan di  e SIDS pa conoce e iniciativanan cu ta tumando luga na Aruba. Un programa yama ‘In Island Assistance’ cu ta bay wordo desaroya dor di TNO, y por ultimo, e aspecto di continuidad maneho dor di Universidad di Aruba.

Expresionnan haci den e articulo aki no necesariamente ta refleha opinion di ArenaPoliti.co