Nos sa cu awoki nos ta drentando den e ultimo lunanan di e acuerdo hasi na 2014 pa cu hedging.
Na 2014, Minister de Meza a sera un contract di hedging di casi 100% hasiendo cu nos ta paga casi $96 pa bari di petroli. Awe nos tur sa y ta sinti e consecuencianan di e decision aki, pasobra mientras cu prijs di petroli riba mercado mundial ta mas o menos $50, na Aruba nos ta pagando casi dobel pa e mesun bari.

Na cuminsamento di e aña aki sr. Mike Eman a sali ta gaba cu nan lo baha tarifa di coriente cu 10%. Pero mirando cu e contract di hedging ta yegando su final, e rebaho lo mester ta entre 25% cu 50%.
Motibo cu mi ta bisa esaki ta pasobra na momento cu Aruba no ta mara mas na hedging, nos lo ta pagando e prijs normal di petroli, cual ta casi 50% menos di loke nos ta pagando awoki danki na hedging. Pagando e prijs real pa bari di petroli lo mester hasi cu automaticamente tarifa di coriente lo mester baha drasticamente y no necesariamente cu 10% so.

Nos pueblo ta sufriendo pa hopi tempo caba pa tarifanan extremadamente caro di servicionan basico, manera awa cu coriente, danki na un mal decision di AVP su Gobierno.
Awor cu e hedging no ta bay ta un obstaculo mas pa nos, lo mas husto ta pa sr. Mike Eman y su Gobierno stipula tarifanan mas accesible y realista pa nos pueblo.

Aruba merece un sosiego di tanto abuso financiero cu e Gobierno aki a hinca nos aden. E ta keda awor na sr. Mike Eman pa dicidi si e ta keda pone nos pueblo sufri pa e por sinta biaha rond mundo aparentando algo cu e no ta, of si por fin e lo pone man na su curason y tuma e decision corecto pa nos Aruba.

Expresionnan haci den e articulo aki no necesariamente ta refleha opinion di ArenaPoliti.co