ORANJESTAD – Prome Minister Mike Eman y su colega Minister Benny Sevinger encarga cu asuntonan di infrastructura a trata e tema di renobacion durante e conferencia di prensa semanal dialuna mainta na Bestuurskantoor. Despues di e prome fase di renobacion di centro di ciudad, ta ehecutando fasenan 2 y 3, cu ta expande riba e trabounan haci durante e prome fase. Den e fasenan aki, e areanan cu ta conecta cu centro di ciudad ta bay wordo renoba.

Renobacion di Rancho ta e siguiente proyecto cu ta cuminsa. “Nos a traha hopi duro pa crea un conexion entre nos waf, Rancho Plaza y hunto cu esey Schelpstraat y tur e cayanan cu ta trece nos na  renobacion di centro di ciudad. Hunto cu esaki nos tin e bario monumental y historico di Rancho. Ranchostraat ta un caya hopi conoci pa esaki, edificionan monumental y historico cu durante añanan a conoce hopi deterioro. Hopi di e edificionan aki ta monumento cu mester atende cu nan. Un area cu ta hopi cerca di curason di nos Minister di Infastructura cu su lombrisihi ta dera eynan.”

Eman a papia di e forma con ta trahando a base di un sistema integral, unda cu e areanan di centro di ciudad ta conecta cu areanan den cercania, manera Rancho. “Manera nos a bisa semper, no tabata solamente e Caya Grandi. Pero si nos cuminsa for di e renobacion di Bestuurskantoor, e Linear Park, tin henter e area di Centro Historico, unda a drecha tur e edificionan historico rond di Bestuurskantoor, Plaza Padu cu ta trahando riba dje aworaki. Na e momentonan aki nos ta trahando riba restauracion di edificio di Algemene Rekenkamer, unda antes tabata Juliana School y Biblioteca Nacional. Caya Caya G.F. (Betico) Croes, cu tambe a conoce un renobacion grandi, den Emanstraat tin renobacion di edificio di Corte, Watertoren, diferente edificio particular tambe a wordo renoba y pronto ta bay drecha e edificio di ex-Voogdijraad cu hopi antes tabata oficina di Censo y Eilandsraad unda cu nos prome eilandsraad a sinta den añanan 1950.” E ex-edificio di Voogdijraad a wordo traspasa pa Renobacion Aruba NV y den e siguiente lunanan e edificio ey ta bay wordo restaura y renoba. Patras di Corte,  La Salle College, Dominicus College y henter e area di Companashi y Socotoro a conoce hopi renobacion. Un poco mas pabou ta drenta den e area di Madiki, unda cu Gobierno a haci hopi trabou. “Awor ta bay conecta esaki cu e trabou cu nos ta bay haci den Rancho, Driemasterstraat, creando asina un circulo completo di centro di ciudad. Pero tambe e barionan y e scolnan cu ta acopla na e centro di ciudad y espacionan publico.”

Prome Minister a bisa cu nunca e ta cansa di bisa cu espacionan publico ta un di e inversionnan di mas bunita cu un pais por haci pa su hendenan y nan futuro. Hopi no ta realisa cu pa recreacion, no ta tur hende tin e entrada pa por bishita paisnan den exterior, of otro luganan di recreo hopi costoso. “Pero ora cu bo crea un espacio publico atractivo manera Linear Park, unda cu bo ta mira tres generacion di famia ta cana, e ta un placer grandi. Bo ta realisa con importante ta pa bo tin parkenan, pa tin luganan di cana, luganan di sosega, luganan di intercambio cualnan ta importante pa mehora e calidad di bida di bo hendenan, cual vision ta parti escencial di su totalidad.”

Otro aspecto cu a bini dilanti, ora cu a papia di renobacion cu ta bay haci den Rancho ta e kioskonan di Paardenbaai Plaza, cual Plaza ta practicamente cla. E kioskonan nobo ta hopi bunita y esnan cu tabata banda di e parada di bus lo muda pa e kioskonan nobo. E parti cu lo keda bashi lo wordo integra den e totalidad di e desaroyo cu ta tumando luga na Rancho Plaza.

Expresionnan haci den e articulo aki no necesariamente ta refleha opinion di ArenaPoliti.co