Den un reaccion riba e pensamento di ABV pa para e proyecto di expansion/renobacion di HOH, nos a tuma nota cu atrobe e minister ta gaña.
Nos a trece padilanti cu e titular di Salud ta haci comosifuera cu ta awor nan sa di e estado di e OK, pero den varios articulo publica anteriormente, mi a bisa caba cu tanto gobierno, Soga, Infra-team y Gerencia di HOH tabata sa di esaki.
Awor e minister kier recuri tambe na intimidacion.
Na prome lugar ta tira culpa, via e corant na Hulandes Amigoe, riba e director financiero di HOH.
Na di dos lugar e minister ta bisando e sindicato cu nan ta mal informa, y nan no sa e consequencianan den e caso cu e proyecto wordo para.
Tambe e minister ta usa e asunto di e seguro medico (Medirisk) como menasa contra e sindicato si encaso pensa di para e proyecto.

Mi ta convenci cu si pidi e seguro pa wanta un rato, y bisanan cu lo bay haci un investigacion, nan lo coopera. Por lo menos por puntra.
Pero no, e minister ta prefera di bulldoze e asina yama "meerwerk" sin destaho publico, usando mentiranan djis pa tapa e corupcion cu a rondona henter e proceso di otorgamento di e proyecto aki.

Mi a tuma mi tempo pa bay coba den varios articulo y noticianan cu a sali den medionan di comunicacion (esunnan comprometi cu e gobierno aki) pa demostra cu tur esnan envolvi mester para responsabel pa e hecho cu tabata tin tempo suficiente pa algo por a ser haci, sin cu mester a warda te awor. Esnan cu a keda "drumi", mester carga nan responsabilidad y no bay intimida y punta dede riba otro.

Despues di cambio di gobernacion na 2009, e Minister Visser a pidi Raad van Bestuur di HOH pa studia e posibilidad pa renoba y expande e hospital na e sitio actual. Mientras tanto cambionan y renobacionnan a tuma lugar riba e OK, siguiendo conseho di Polytechnisch IngenieursBureau (PIB) y tambe na e ICU/MCU na 2009. Tur esaki despues cu e centro di dialyse a wordo inaugura tambe na 2009.

E Raad van Bestuur e tempo ey a yega na un acuerdo cu algun minister di gabinete Eman 1 cu lo debolbe HOH e suma di 10 miyon florin, cual ta e inversion cu a ser haci riba e 3 proyectonan ariba menciona (Dialyse, Ok y ICU/MCU). Y a PALABRA cu NO lo INCLUI e OK den e plannan nobo. Pues, no tira culpa riba HOH, pasobra en todo caso Mike Eman y Visser tabata na altura, y a bay di ACUERDO cu lo NO inclui e OK den e proyecto di renobacion/expansion.

Manera mi a bisa caba, cu ta for di januari 2011 caba mi a cuminza alerta pueblo pa loke lo por pasa, pero mucho oido no tabata tin.
Pa cuminza na mei 2011 gobierno a acerca SOGA respecto e renobacion di HOH. Na prome instancia e renobacion lo tabata encera construccion di 3 toren nobo. Pero a deshaci di e plannan aki pa motibo di e tereno banda pazuid cu ta manera un "moeras" ora cu yobe, y alabes a deshaci di e grupo hulandes pa trece e mafioso Bermello aden.
Na februari 2012 a firma un contract cu e compania di architecto Bermello.
Despues di hopi discusion y cosnan straño entorno e proyecto, na januari 2013 Parlamento a aproba e financiamento di e proyecto, pa despues traspasa e edificio y tereno pa SOGA. SOGA a paga 40 miyon florin. No mester perde for di bista cu Gobierno a palabra cu Raad van Bestuur di HOH cu lo traspasa 10 miyon florin,  cual ta e suma cu HOH a paga pa e renobacion di e.o. e OK na 2009; sinembargo gobierno no a cumpli cu e palabracion tampoco.
Na mei 2013 reglanan di e destaho publico ta wordo entrega na e companianan cu un deadline pa participa na e proyecto na juli 2013.
Den e curso di juni 2013 ya caba a cuminza sospecha cu e OK NO ta cuadra cu e exigencianan di awendia, y sigur lo no por wanta 25 aña.
Na augustus 2013 un presentacion a ser duna na AIB/SOGA, INFRA-Team y Raad van Toezicht di HOH riba e estado di e OK di HOH, pues mas cu un aña y mei pasa y PROME cu e contract cu Arrellano a ser firma. Despues di augustus 2013 TUR stakeholder CONTINUAMENTE tabata ser atendi riba e hecho cu algo mester ser haci cu e OK.

HOH parce a acerca un compania hulandes Bussman pa traha riba un plan cu lo por trece un solucion pa e OK pa e siguiente 25 añanan. Ta straño cu no ta ser menciona cu esnan involvi, esta Infra-team, AIB/SOGA no a haci nada cu e presentacion cu nan a haya na augustus 2013.
Den medionan di comunicacion sr. Hodgson, director di SOGA, ta declara den luna di januari 2014 cu nan ta papiando cu Arrellano pa baha e prijs. Dicon no a papia cu Arrellano tocante e problema cu e OK, siendo cu for di augustus 2013 nan a ser poni na altura??
Dia 16 di april 2014 e medionan di comunicacion tabata yen di articulonan tocante e firmamento di e contract cu Arrellano, pero SIN cu a ser poni ni un solo palabra tocante di e problema cu e OK, siendo cu TUR stakeholder a ser poni na altura for di augustus 2013 caba.
Ta parce cu mester a firma den pura, sin cu a regla e asunto di e OK, pasobra un paar di dia despues di e firmamento ata full e gang ta na Miami pa un presentacion di e plan di Bussman. E presentacion aki a ser haci den luna di mei 2014.
Den e presentacion aki na Miami, na unda tabata presente representantenan di Infra-team (3), AIB (2), SOGA (3), HOH (3),Bermello (3) y un representante di Bussman, amplio splicacion a ser duna na esnan presente.

E proyecto aki ta encera un SOLUCION permanente pa e siguiente 25 aña pa e OK di HOH, cu uno di un sistema moderno cu ta uno "modulair", pues tin e flexibilidad cu facilmente cambionan por ser haci ora cu esaki ta necesario den caso cu desaroyonan technologico ta exigi esaki, sin mucho molester y mas importante sin cu e gastonan ta hopi halto.
E minister mes a declara cu ta for di medio 2014 a invita TNO pa haci un evaluacion di e problema cu e OK. Na augustus 2014 TNO a entrega nan "bevindingen" y a warda ATROBE te november 2014 pa pidi nan amiguisimo Bermello pa traha un oferta.
Hopi peculiar den esaki ta cu Bermello a haya e instruccion explicito pa NO considera e plan di Bussman.
Esaki ta hopi straño, pasobra awor a bin resulta cu e oferta di Bussman ta bow di 9 miyon dolar ($), cual ta mas di 6 miyon dolar ($) mas barata cu esun presenta pa Bermello, y ademas e ta un solucion permanente y no manera esun di Bermello cu tin un parti temporal cu lo costa casi 4 miyon dolar ($) y e parti cu lo keda y cu lo costa 11 miyon dolar ($). Pues total 15 miyon dolar ($), y no manera e minister kier laga hende kere cu ta solamente 7.2 miyon FLORIN esaki lo sali. Aki un biaha mas e minister ta GAÑA!!

Cu e compilacion aki, ta wordo comproba cu e minister y TUR otro stakeholdernan tabata na altura di e problema cu e OK for di augustus 2013, pues prome cu e firmamento di e contract cu Arrellano cu a ser firma dia 16 di april 2014. Pues esaki ta proba cu tanto e minister como AIB/SOGA ta GAÑA, y cu esaki ta demostra cu esnan responsabel cu e problema di e OK no a ser soluciona na tempo, ta e ministernan Eman, Visser, Schwengle y AIB/SOGA!
P'esey, cu no tin tempo pa por a tene un destaho publico, tampoco ta berdad. Mi ta convenci cu si e compania di seguro wordo acerca y bisa cu tin un solucion permanente cu lo por keda cla por ehempel na augustus 2015, nan lo bay di acuerdo cu esaki. Y si nos ta laat, no bay tira culpa riba ningun hende, pasobra abo mes por kier. Kizas e minister tabata mucho ocupa pa regla su re-entrada na hospital como longarts, strobando asina un otro yiu di tera pa traha como longarts den HOH.
Pa e motibo aki UPP ta para 100% tras di ABV pa exigi un paro di e trabownan pa haci un investigacion forensico, y despues bay over na haci e cos aki manera mester ta, y cu tur e transparencia rekeri.
Nos ta spera cu otro partidonan y sindicatonan para tras di ABV tambe, y si mester pone e presion necesario pa para e proyecto; no mester duda pa haci esaki.
No lubida cu na final di cuenta ta pueblo ta esun cu lo mester bay paga e proyecto aki cu, manera cos ta mustrando, facilmente lo por bay paga 1 biyon florin pa un hospital renoba.


Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, februari 25, 2015

Expresionnan haci den e articulo aki no necesariamente ta refleha opinion di ArenaPoliti.co