Perspectiva Independiente without background 001

RAIZ su vision pa un E-government

UrsellArends01Transparencia den gobernacion ta un prioridad pa partido RAIZ. Un forma cu RAIZ kier realisa esaki ta door di transforma nos gobierno den un ‘E-government’. Pero den e vision di RAIZ, un ‘E-government’ por percura pa mas cu transparencia.
ArenaPoliti.co a acerca partido RAIZ pa haya mas informacion di e proposicion pa transforma nos gobierno den un E-government. Sr. Ursell Arends, lider di RAIZ, a percura pa un splicacion mas amplio di nan vision.

Digitalisacion y automatisacion 
Ursell Arends: “Raiz su vision ta un gobierno cu ta enfoca riba e posibilidadnan di digitalisacion y automatisacion pa modernisa gobierno, mehora servicio publico y pa promove tranparencia y eficiencia pa medio di ICT.” Segun sr. Arends, RAIZ lo pone enfasis riba creacion di un gobierno eficiente y transparente pa medio di automatisacion di procesonan. “Na prome instante mester haci un analisis profundo den e aparatonan gubernamental y wak unda por haci cambionan necesario pa medio di tecnologia. RAIZ ta di opinion cu mester acelera e proceso di digitalisacion y automatisacion pa asina brinda nos pueblo e miho servicio.”

... mester haci un analisis profundo den e aparatonan gubernamental y wak unda por haci cambionan necesario pa medio di tecnologia.”

Corupcion
RAIZ lo duna prioridad na procesonan cu ta vulnerabel pa corupcion y kier kita cierto poder di ministernan, manera otorgamento di tereno, destaho publico y otorgamento di permiso. E lider di RAIZ ta duna un ehempel di con esaki por funciona den practica: “Traha un “volgsysteem” unda por wak e status di un peticion pa tereno. Asina pueblo tin control via acceso online, sin intervencion di hende, cuanto mester warda prome cu e tereno ta disponibel. Esaki ta brinda nos pueblo un instrumento pa controla y tene su gobierno responsabel y integro y na mes un momento reduci e posibilidad di corupcion. Asina tecnologia por trece mehoracion den mas departamentonan di Gobierno.”

Servicio
Banda di haci uso di automatisacion pa preveni corupcion, RAIZ ta wak posibilidadnan pa mehora servicio publico. Sr. Arends: “Personanan, companianan y instancianan mester por, na un manera facil y rapido, comunica cu gobierno. Esaki ta nifica cu informacion di gobierno mester ta accesibel, actualisa y transparente. Pa realisa esaki RAIZ ta propone pa crea un “webportal” conhuntamente cu un account/digital ID protehi, pa asina cada ciudadano por tin acceso online na su propio documentonan cu gobierno tin di su persona.” Sr. Arends ta splica cu por medio di un sistema asina un ciudadano por pidi un permiso, adapta su informacion personal y haci uso di otro servicionan gubernamental. Tur esaki den un forma digital, na cualkier momento y for di cualkier caminda.

Personanan, companianan y instancianan mester por, na un manera facil y rapido, comunica cu Gobierno.”

DigiD (Digital Identity)
Pa ciudadanonan por haya acceso priva na e sistema digital via un ‘webportal’, RAIZ ta propone pa haci uso DigiD. Hopi Arubiano cu a biba na Hulanda tin experiencia cu DigiD. Na Hulanda, DigiD ta funciona como un tipo di ‘personal account’ cu bo username, password y eventualmente cu un code cu ta wordo manda pa bo telefon. Tambe por login usando un app riba bo smartphone. E ‘personal account’ aki por wordo usa pa login riba varios website/servicio gubernamental.

Sr. Arends ta splica: “Ora un hende drenta e “webportal” for di su cas nos mester un manera pa confirma su identidad. DigiD ta e nomber di un sistema cu por verifica un persona su identidad riba internet, un sorto di paspoort digital pa servicionan publico. Ora di login riba “webportal” por authentica e persona aki por medio di su DigiD. Hopi pais, entre otro Hulanda, ta hasi uso di e concepto aki pa authentica nan ciudadanonan riba internet. Lo percura pa cada ciudadano, ora di implementa E-governance, por tin acceso na un identidad digital.”

E miho data disponibel
Segun RAIZ, E-governance no lo beneficia solamente e ciudadano, pero tambe gobernantenan, parlamentarionan y diferente instancia. Ursell Arends: “RAIZ ta boga pa gobierno y parlamento tuma decisionnan usando e miho data disponibel. Un gobierno responsabel ta depende riba data actualisa y confiabel pa tuma decisionnan corecto. Cu E-governance nos por produci raportnan mas liher y confiabel pa instancianan y gobernantenan y no mester tuma desicion a base di speculacion of emocion. Asina nos por brinda gobernantenan, comercio y pueblo e hermentnan pa tuma decision cu data actual y corecto. Di e forma aki por minimalisa desicionnan menos benificioso pa Aruba.”
RAIZ ta boga pa gobierno y parlamento tuma decisionnan usando e miho data disponibel.”

Adapta nos leynan 
Segun e lider di RAIZ ta necesario pa adapta nos leynan pa realisa nan plan pa transparencia y servicio digital por medio di un E-government. “Actualmente nos leynan ta hopi anticua y mester revision di leynan existente como tambe percura pa leynan nobo pa nos vision di un E-governance por bira realidad.” Como ehempel di un ley existente cu mester di revision, sr. Arends ta menciona e Landsverordening openbaarheid van bestuur (Lob).

Realisando e cambionan aki, RAIZ ta convenci cu por reduci trabounan administrativo, reduci gasto di gobierno, hisa e calidad di servicio publico y hasi gobierno mas eficiente y transparente.

Expresionnan haci den e articulo aki no necesariamente ta refleha opinion di ArenaPoliti.co

x

 

Inscribi pa ricibi un resumen semanal di e articulonan mas impactante.