Sinembargo, e proyecto no a wordo bon structura te cu departamentonan y instancianan oficial y di orden publico a bay over siman pasa na cera e centro, despues di a constata cu varios situacion cu no ta cumpli cu reglanan vigente.
Den e cuadro aki mi kier observa lo sigiente, mi por compronde cu tin mayor cu no sa cua caminda mas pa cana y pa haya yudansa pa comportacion di nan yiu, pero di parti di Gobierno mester evalua si mester introduci reglanan specifico pa institutonan di e indole aki, ja asina mayornan por ta sigur cu tin un bon supervision di e instancia unda nan ta pone bo yiu. Mester reglamenta entre otro cu e parti di formacion mester ta den man di profecionalnan cu por guia e hobennan aki den nan conducta. Den mi concepto un persona pa giua un organisacion asina mester tin e educacion social y tambe un experencia amplio pa maneha un centro cu tin di haber cu formacion y correction di hoben. Y un boot camp tambe mester cumpli cu reglanan di higiena y tin facilidadnan apropia.
Pues lo ta bon pa Gobierno considera e situacion aki como uno serio, y evalua si mester introduci leynan adicional pa reglamenta centronan asina, caminda  cu na final di dia ta sernan humano ta ser interna.
Por ehempel dor di reglamenta cu mester di vergunning den cual ta stipula condicion nan.
Ta bon cu Gobierno ta inverti den nos turismo y otro areanan pa asina e economia di Aruba por drei, pero e parti di formacion social di nos hendenan tambe ta hopi importante. Pasobra ta nos hendenan ta bay den tereno laboral, y ta e bon servicio ta yuda crea un bon nomber pa Aruba y su economia.
Mi ta spera cu esaki ta un experencia pa nos como mayor, cuidadano y mandatario y pa asina actua miho y pa evita tipo di situacionnan asina den futuro!