Siman pasa nos a tuma nota cu e director di WEB a wordo retira. E argumento cu a wordo duna tawata cu no tin confiansa mas riba nivelnan halto. Loke pueblo kier sa ta desconfiansa riba cual nivel? Entre director y Minister de Meza? Entre Hunta di Comisario di WEB cu director of si ta entre director cu Hunta di Comisario di Utilites. Ora cu nos ta papia di nivel halto tin 3 organo mas halto cu ne cu ta dun’e instruccion kico pa haci.
Ora cu nos ta papia di desconfiansa nos kier haya sa ken ta esun cu a duna e opdracht pa bay hedge cu te dia di awe tin pueblo perhudica.  Nos mester ta honesto, e motibo cu director di WEB a wordo retira ta pasobra a sigui instruccion cu no a bay bon. Esaki nos ta yama un acto di mala fe, siendo cu ta e minister encarga cu utilidad ta esun cu a instrui pa bay hedge 95% di e uso di heavy fuel oil.
Con cu bo wak e accion tuma ta uno inhusto pasobra si bo retira un persona cu a actua bou instruccion di gobierno lo mester nifica cu e huntanan di comisario di WEB y Utilies, incluyendo Minister de Meza tambe mester bay!
Tambe a menciona e falta di transparencia den henter e proceso. Ta straño cu e Hunta di Comisario apunta door di e minister concerni no tawatin tur documento. Esaki ta algo sumamente cuestionabel pasobra bo lo a spera feedback di nan. Minister de Meza a referi tambe na e situacion financiero di WEB pero loke e situacion ta awor ta un refleho con el’a hiba e maneho financiero di nos pais y netamente esey ta e caso awor cu WEB.

Expresionnan haci den e articulo aki no necesariamente ta refleha opinion di ArenaPoliti.co