Un proyecto exitoso cu a transporta 350 mil turista y localnan den Caya Grandi pa aña 

E streetcar aki ta parti di e plan original, esey kiermen cu no tin ningun costo adicional pa gobierno 

ORANJESTAD – Entre diamars y diaranson a descarga e di tres streetcar cu ta bay forma parti di e sistema AruTram. E vehiculo ta destina pa transporta turista y local den direccion di centro di ciudad. El a yega Aruba abordo di e barco di carga Viking Eagle for di Miami despues cu el a keda transporta for di e fabrica na California.

Miembronan di Ministerio di Infrastructura, ASTEC y AruTram a presencia momento cu a pone e streetcar oraño pa prome biaha riba e railnan dilanti di waf na Oranjestad. Cuidadosamente a realisa e operacion aki e area caminda ta bay construi e Welcome Plaza y e tram ta busca turistanan crucero pa hibanan den area comercial di Caya Betico Croes.

Tecnico di TIG/m actualmente ta na Aruba pa asina haci e prome trabounan di instalacion di piezanan cu a bin separa. Den transcurso di otro siman ta yega ingenieronan di e compania pa haci tur e testnan pa comproba cu e vehiculo ta funciona debidamente. Despues di esey, ta firma e traspaso oficial pa AruTram.

Manera ta conoci, e proyecto di tram ta conta cu cuater streetcar, di cual un ta di reserva. Actualmente, ya ta transporta un total di mas di 350 mil pasahero, e mayoria turistanan crucero, y e vehiculo nobo ta yega pa alivia e demanda y baha e cantidad di tempo cu usuarionan ta warda entre un tram y e otro. E streetcar aki ta forma parti di e plan manera a keda presenta originalmente, esey kiermen cu e no ta un compra adicional, ni tampoco ta representa gastonan extra pa caha di Gobierno di Aruba.

Expresionnan haci den e articulo aki no necesariamente ta refleha opinion di ArenaPoliti.co