Awe 13 di juli ta un dia historico pa pais Aruba, ya cu riba e fecha aki nos ta recorda cu 25 aña pasa e fecha di Independencia 1996 a wordo gescrap for di den Statuut. Tabata na maart 1983 durante e Conferencia di Mesa Rondo na Den Haag a ser acorda 33 punto di consenso den cual a acepta e resolucion di Aruba pa haci uzo e momento ey di su derecho di autodeterminacion door di scoge definitivamente pa Independencia, cu mester wordo realiza na aña 1996 y cual fecha a wordo poni den Statuut. Como fase transitorio prome cu Independencia, Aruba a haya pa un periodo di 10 aña su Status Aparte entrante 1 di januari 1986. Alabez a ser acorda cu prome cu 1996, esta na 1994 lo wordo teni un conferencia di evaluacion entre Reino y Aruba pa eventualmente examina e fecha di Independencia di Aruba den luz di evolucionnan estatal entre e paisnan den Reino.

Claridad estatal
Na 1986 Aruba a bira un pais soberano den Reino y partido AVP – a base di Materialismo cu a vence Idealismo - a drenta como e prome gobierno di pais Aruba. Durante nan gobernacion di 3 aña (1986-1988) nan no a haci net nada riba tereno di structura estatal. Tabata e eleccion di januari 1989 cu a trece MEP den gobierno atrobe y un di e metanan primordial tabata pa trece claridad riba tereno estatal. Esaki tabata necesario pa diferente motibo: 1. E cadena hotelero Hyatt kier a mira claridad definitivo pa loke ta e fecha di 1996, prome cu nan sigui inverti den nan proyecto, 2. Nos pais tabata tin debenan astronomico di garantianan cu mester wordo paga na e Mafianan Italiano, 3. Pensioenfonds di Hulanda tabata menaza di no fia placa na FCCA pa construi casnan social na Aruba, 4. Ministerio di Defensa Hulandes no tabata kier a sigui inverti den e Marinierskazerne na Aruba. Tur esaki en bista di e fecha di Independencia 1996 cu tabata colga riba cabez di Aruba.  Ta pesey mes Gabinete Oduber a apresura e proceso pa trata na haya e garantianan manera palabra den e Conferencia di Mesa Rondo na maart 1983, esta cooperacion cu Reino den un Man Comunidad riba e terenonan di asuntonan di desaroyo, cultura, educacion, husticia, relacionnan exterior y defensa.



Transparencia politico
Pero mirando cu tempo tabata preta y cu Gobierno Hulandes no kier a honra e palabracionnan pa cu un Man Comunidad, sr. Nelson Oduber a opta pa actua riba e expresion di Libertador Betico Croes na final di e Conferencia di Mesa Rondo. Betico Croes a bisa Ministro Presidente Ruud Lubbers e tempo ey, cu Aruba ta acepta e fecha di Independencia di 1 di januari 1996, pero “nos lo bolbe riba esaki”. Den cuadro di transparencia politico, partido MEP a tene e tempo ey un reunion na ex-Bushiri Hotel, caminda lidernan di bario a duna mandato na partido pa sigui cu e proceso pa cu scrapmento di fecha di 1996. Na e reunion ey, yiunan di Betico Croes, esta Glenbert y Junior tambe a acudi y a duna sosten na e deseo cu tabata biba  bao di e pueblo Arubano. Tambe den e trayectoria aki varios ta e persona, politico y conseheronan prominente cu a yuda ex-lider di MEP Nelson Oduber den e lucha aki, manera e.o. Hendrik Croes, Guillermo Trinidad, Roland Lacle y Poy Werleman.



Auto-determinacion salvaguardia
Asina pues dia 13 di juli 1990, esta awe 25 aña pasa, ex-Ministro Presidente Nelson Oduber a firma hunto cu Ministro Ernst Hirsch Ballin un convenio, unda a scrap e fecha di Independencia 1996 for di den Statuut y Aruba ta mantene e derecho di auto-determinacion, esta cu nos pueblo ta dicidi ki dia nos lo kier bira independiente, via un Referendum pero cu aprobacion tambe di 2/3 parti di Parlamento. Esaki siguramente ta un logro historico, caminda den forma ordena ta determina e proceso na momento cu Aruba lo kier bira independiente un dia.
Awe nos tur como Arubiano mester ta hopi contento cu e scrapmento di e fecha di Independencia for di den Statuut 25 aña pasa y cu nos a mantene nos Status Aparte, ya cu nos tur lo por imagina nos mes con nos pais lo ta na e momento aki, esta un pais independiente bao di un regimen dictatorial di AVP cu tur dia ta oprimi y persigui su contrincantenan politico.  
Partido MEP ta gradici su lider honorario Nelson Oduber pa e curashi desplega na 1990 pa logra un obra historico pa pais Aruba, esta scrap e fecha di 1996 for di den Statuut  y tambe na nos lider inmortal Betico Croes cu a planta e simia aki durante e Conferencia di Mesa Rondo na maart 1983. Pabien Aruba. Pabien cu continuacion di nos Status Aparte.

Expresionnan haci den e articulo aki no necesariamente ta refleha opinion di ArenaPoliti.co