Dia 9 di mei 2015 Dominico Guzman Croes a cera su wowonan pa semper. Guzman, manera e tabata wordo yama, tabata un baluarte, un pilar solido di partido AVP, un persona cu un carera politico impresionante y inigualabel. Te cu su ultimo rosea el a keda fiel na su partido AVP. Guzman a nace dia 2 di juli 1924 na Aruba. Yiu homber di Pablo Porfirio Croes y Maria Croes-Geerman. Na e edad hoben di 23 aña Guzman a afilia su mes na partido AVP y dos aña despues a subi lista di partido na 1949. Esaki riba peticion di Henny Eman Sr. kende tabata un luchador ferviente di nos Status Aparte. Un lucha cu hunto cu yiu di Henny, Shon A Eman, Guzman a continua. Un lucha cu a dura hopi aña y tabatin un meta comun, pa ta baas den nos mes cas. Un lucha cu a cuminsa na comienso di siglo pasa, un lucha cu Guzman a kere firmemente den dje. Hunto cu su tata y tres ruman homber, Guzman orguyosamente a pone su firma bou di e peticion cu Shon A Eman a hiba Hulanda na Mesa Rondo y entrega dia 18 di maart 1948. Un peticion cu a bira e fundamento di e nos Status Aparte y e fecha 18 di maart pa e motibo aki a desemboca den nos Dia Nacional. Guzman a para na cuna di nos Monumento 18 di maart, unda nomber di 2147 firmante ta graba pa semper. Na 1955 Guzman a bira miembro di Conseho Insular di Aruba (Eilandsraad) cu a keda funda na 1951. Na 1967 Guzman tabata diputado di Aruba y na 1971 el a huramenta como Minister di Asuntonan Economico. Despues di morto di Shon A Eman na 1967, Guzman a lidera partido AVP cu tabata pasa den periodonan turbulento. Na 1973 tabatin tres partido cu a bay eleccion, AVP, PPA y MEP, cada un encabesa pa un Croes, Guzman Croes, Osvaldo Croes y Betico Croes. Na 2006 Guzman Croes a keda nombra oficialmente como un ‘veterano di guera’. Pa mas cu 17 aña Guzman tabata un miembro di Eilandsraad y 9 aña di Staten di Antiyas. Semper el a wordo eligi cu votonan preferencial y durante su carera politico tabata nr. 2 riba lista te ora el a tuma rienda di partido na 1967 y a bay eleccion pa prome biaha como lider di partido na 1969. 

Guzman tabata conoci pa su discursonan elocuente durante reunionnan publico na unda e tabata tene su audiencia den su gara cu su bos duro, firme, yamativo y su mensahenan al caso. E tabata un hende cu semper a destaca, un persona no-nonsense y directo. Un bon casa y bon tata pa su yiunan, pero bida tabata duro cu Guzman. El a perde su prome casa y mama di su cuatro yiunan, Nicolina, na edad hoben. Su di dos casa Gladys tambe a fayece na edad hoben. Dos yiu di Guzman, Oscar y Richi a muri a consecuencia di accidente di auto. Un sla duro.

E meritonan di Guzman a wordo honra cu varios condecoracion. Medaya pa Servicio Militar den Segundo Guera Mundial. Su Mahestad Reina Juliana a condecor’e cu e medaya di Officier in de Orde van Oranje Nassau y prome cu esaki el a haya e condecoracion di Ridder in de Orde van Oranje Nassau. Dr. Rafael Caldera di Republica di Venezuela a otorg’e e medaya di Orden di Francisco de Miranda Primera Clase y el a ricibi e Yabi Simbolico di e alcalde di Lima, Peru.

Guzman, un persona humilde cu no tabata gusta fanfaria, a biba un bida bon, largo y rico na experencia. E ta laga atras su señora Yuwaya y dos yiu muhe, Lupina y Mislin, nieto y nietanan, sobrino y sobrinanan cu semper a stim’e sin condicion. Partido AVP ta perde un di su hendenan di prome ora, un pilar fuerte, un mata grandi. Awe ta hib’e na su ultimo luga di sosiego. Dominico Guzman Croes, sosega na paz.

Partido di Pueblo Arubano AVP

Expresionnan haci den e articulo aki no necesariamente ta refleha opinion di ArenaPoliti.co