Evelyn Wever-Croes den reunion Tripartiet cu Aruba, Curacao y Sint Maarten 

Den Haag -- Den reunionnan entre e parlamentonan di Aruba, Curacao y Sint Maarten dialuna a trata entre otro e tema di ensenjansa, y e problemana cu studiantenan ta encontra cu cobransa di fiansa di estudio di hulanda (IBG of DUO).
Di parti di Curacao sra Zita Jesus-Leito (PAR) a wordo tresi dilanti cu Curacao ta purbando pa haya un oficina di DUO na Curacao, pa por atende cu e miles di studiante cu tin problema cu pago di nan fiansa di estudio hulandes.

"Na Aruba tin hopi necesidad pa esaki tambe. Nos ta wordo aserca pa hopi young professionals cu tin e problema aki. Nos colega di partido Gerick Croes ta bringando pa nos logra esaki, y pesey mi a trese e punto aki padilanti den reunionnan na Hulanda.
Durante e reunion mi a propone pa Aruba sostene Curacao den esaki, pasobra na Aruba tambe tin masha hopi ex studiante cu tin problema cu e fiansa di IBG of DUO. Centenares di ex studiante ta haya nan den discusion cu e deurwaarder na Curacao y den Corte. Tur esaki por wordo atendi mihor si nos tin un HELPDESK di DUO na Aruba mes. Te ainda Hulanda no kier a aproba esaki debi na e gastonan halto, sinembargo si Aruba y Curacao uni forsa, nos por logra haya un oficina di DUO mas serca di cas. Mi a compromete cu sra. Jesus-Leito pa nos traha hunto riba esaki. Aruba merese mihor, nos studiantenan merese mihor, y nos lo purba di tur forma por trese e mehoransa aki" lider di MEP Evelyn Wever-Croes a duna di conose.

Expresionnan haci den e articulo aki no necesariamente ta refleha opinion di ArenaPoliti.co