Por lo pronto 

Awe corte a dicta cu Windpark Urirama NO por usa e hindervergunning cu gobierno a dune anja pasa april y juni mas y si nan kier sigi cu e proyecto, nan mester cuminsa cana nan caminda full di nobo. Nan no por cuminsa construi tampoco mientras tanto. Consequentenente e habitantenan cu a apela e caso no mester preocupa mas cu construccion ta cuminsa, pues no tin interes mas den e caso cu ta den corte aworaki y nan caso a wordo declara no-admisible y no a gana e caso. Sinembargo nan a logra nan meta si, pasobra hues a para e proyecto por lo pronto, a base di otro argumento. E caso aki a wordo trata algun siman pasa den cual habitantenan a cuminsa un caso pa para e proyecto. Tin 4 grupo di habitante ta bringando e caso aki.

"Ami tabata un di e abogadonan, representando un habitante bon amigo di nos gratuitamente. Nunca mi tabata asina contento di perde un caso, pero den e caso aki SI, nos a logra nos meta. Pasobra Alto Vista lo keda cu su pas y trankilidad, y habitantenan di Noord lo no core riesgo pa nan salud, por lo pronto.
E argumentonan principal cu ami a presenta dilanti hues ta cu e proyecto tin un riesgo halto di causa problema na salud di hende, y asina mes gobierno no a exigi di nan un estudio di impacto di salud. Tambe cu e hindervergunning a wordo duna contra ley, pasobra e area di Urirama ainda segun ley ta un tereno di naturalesa y NO industrial. E interesnan di habitantenan NO a wordo considera suficiente, na mi opinion. Nos no ta bringando energia di biento mes, sino e localidad di e molinanan monstruoso cu lo elimina un parti crucial di nos naturalesa y mas aun, lo emilina e pas y trankilidad cu tin na e kapel di Alto Vista. Nunca mi a sconde con CONTRA mi ta pa e molinanan wordo ubica na e lugar ey.
Si Windpark Urirama bai pidi vergunning nobo lo por tarda 2 anja prome cu nan keda cla, y pa e ora ey tin un otro gobierno cu sigur lo bai para e proyecto aki! Pasobra Aruba merese mihor, y salud di hende bo no ta hasi wega cune.
Mi ta felicita y gradisi esnan cu a demostra perseverancia y curashi y a bringa hunto cu nos. Nos ta prepara pa e sigiente tanda caba, pasobra tanten cu Dios dunami bida y salud lo mi bringa e proyecto aki. Pabien Aruba, especialmente pueblo di Noord" tabata palabranan di Evelyn Wever-Croes.

Expresionnan haci den e articulo aki no necesariamente ta refleha opinion di ArenaPoliti.co