MoU firma cu Banco Mundial 

ORANJESTAD/WASHINGTON- Diamars Prome Minister Mike Eman a firma un MoU cu VP pa Caribe y Latino America di Banco Mundial Jorge Familiar. Sin duda algo masha importante y esencial pa Aruba. Vision di Prome Minister Eman y maneho di gobierno di Aruba ta haciendo impacto tur caminda. Un isla chikito cu plan y innovacionnan grandi. Su maneho riba sostenibilidad y durabilidad a pone e isla chikito Aruba riba mapa mundial. Aki ta unda e vision di Prome Minister Eman ta resalta.

Eman ta haya e acuerdo firma hopi importante. Sigur si tene na cuenta cu durante e ultimo añanan gobierno di Aruba a bin ta intensifica e contactonan cu Banco Mundial. “Riba nos invitacion nan a bin Aruba y durante e bishita nos a mustra nan con Aruba a pone desaroyo sostenibel como meta primordial pa e siguiente etapa di progreso. Nos ta enfocando grandemente den busca modelonan economico caminda por traduci crecemento economico den un miho calidad di bida pa e ciudadano. Tin hopi pais cu tin cifranan impresionante di crecemento economico mescos cu Aruba tambe a yega di conoce ora turismo a expande grandemente y awor  cu a inverti pa recupera economicamente. Esencial pa nos ta pa crea modelonan economico pa por diversifica economia, crea un mobilidad social mas grandi pa e hendenan cu ta drenta mercado laboral sigui crece y haya bon trabou cu bon entrada. Tambe cu e oportunidad husto pa por sigui progresa den nan posicion y sigui crece.” Mas aleu Eman a enfoca riba un ‘learning society’ cu ta un comunidad na unda no unicamente e hendenan ta haya un diploma y eynan ta termina nan formacion, pero cu e formacion mester ta continuo. Den esaki Banco Mundial por hunga un rol grandi. Mescos tambe ta haciendo un revision di e aparato gubernamental, con entre otro ta aloca gastonan di personal, di servicio y producto, di interes y kico ta e necesidadnan cu un pais moderno tin pa por mantene e productividad, eficiencia y impulso cu ta buscando pa un modelo economico nobo.

“Tur ta topiconan hopi sofistica cu ta hiba Aruba den un otro etapa di desaroyo y importante pa e maneho di sostenibilidad cu ta bira duradero. Pa esaki semper por apela riba institutonan grandi den mundo cu a mira hopi economia – di Francia, Alemania, Inglatera y tambe den Sur-America y Merca mes – y tin asina hopi conocemento di e diferente modelonan economico y kico ta e retonan cu ta premira.” Eman a bisa cu ta temanan importante pa gobierno por posiciona su pueblo y su pais den e bon direccion pa por garantisa cu cosnan negativo cu ta pasa den mundo ta afecta bo menos, pasobra cu como pais bo ta miho prepara.

“Banco Mundial tin un conocemento vasto den tur e areanan aki y locual nos a firma ta un acuerdo riba tereno di sostenibilidad, riba tereno di desaroyo economico, di energia, riba maneho di nos lama, con pa cuida y proteha miho nos recursonan natural pa loke ta eficiencia, con maneha den forma inovativo gastonan di gobierno cu un impacto mas positivo riba nos economia. Tur ta temanan cu nos a acorda cu ayudo grandi di representante di Reino aki. El a habri e caminda pa Aruba por a haya e tipo di cooperacion aki cu Banco Mundial. Nos ta contento cu nos a logra firma un MoU. Awor nos mester bay yena e cuatro temanan cu Banco Mundial kier pa Aruba tin den diversificacion y consolidacion y desaroyo sostenibel di nos pais.” 

Expresionnan haci den e articulo aki no necesariamente ta refleha opinion di ArenaPoliti.co