Minister Otmar Oduber a reuni cu hunta di directiva di AHATA 

Minister Otmar Oduber a reuni despues di algun tempo cu miembronan di hunta di directiva di Aruba Hotel and Tourism Association (AHATA). E mandatario ta comenta cu cos ta bayendo asina bon den oficina di turismo, cu participacion di AHATA y representantenan di Gobierno, cu practicamente no ta sinti e necesidad pa topa den un forma regular.  A pesar di esaki a atende varios puntonan cu ta pendiente.

Un di e topiconan cu a discuti riba dje ta e “RevPar Agreement”, cual segun e mandatario di Turismo  tin algun hotel cu ya ta ehecutando esaki, pero mester dune mas atencion pa garantisa e futuro di e hotelnan y futuro economico di nos turismo.

Un otro punto di atencion durante e reunion aki tabata e topico di entretenimento musical na hotelnan. Kier mira mas musiconan local of mas di e entretenimento musical local den nos hotelnan. Sr. Oduber como Minister di Turismo pero tambe como Minister di Cultura ta para pa promove nos localnan den e area aki. “Esaki sigur tin atencion di AHATA” Minister Oduber ta sigui comenta. Departamento di Cultura recientemente a palabra cu AHATA cu lo haci un inventarisacion di entretenimento den nos hotelnan. Intencion ta pa haya informacion mas specifico di cuanto musico local tin of grupo local ta forma parti di e entretenimento den e area turistico aki. Segun AHATA tin hopi local ta formando parti di e itinerario di actividad na nos hotelnan. Kier stimula restaurantnan tambe pa haci esaki y aumenta e cantidad di musiconan local den e area. Unabes tin e resultado di e inventarisacion por fiha un maneho adecua den cuadro pa stimula mas talento local den esaki. Minister Oduber ta conciente cu su colega Minister di Labor, tambe ta reuniendo cu hotelnan riba e posicion huridico di e artistanan. Demostrando asina e atencion amplio di parti Gobierno di Aruba riba e topico specifico aki.

Minister Otmar Oduber a keda hopi satisfecho cu e reunion mirando cu Ministerio di Turismo y e hunta di directiva di AHATA ta mirando den e mesun direcion.

Expresionnan haci den e articulo aki no necesariamente ta refleha opinion di ArenaPoliti.co