Aruba a ricibi 481.706 bishitante te cu luna di mei e aña aki 

Aruba ta sigui goza di un turismo creciente danki na e esfuerzo grandi y trabou incansabel di entidadnan manera Ministerio di Turismo, Aruba Tourism Authority, Aruba Airport Authority y tambe organisacionan manera AHATA. Esfuerzonan cu a concreta den crecemento stabiel di nos Turismo y resultadonan positivo pa economia di Aruba. Pa e luna di mei 2015 Aruba a conoce 87.691 turista cu a bishitanos y esaki ta 9.604 turista mas compara cu e cifra di mei 2014.

E mercado cu actualmente ta primordial pa nos industria turistico, e mercado Norte Americano, a representa 60.2% di e mercado total di turismo pa Aruba. Pa e luna di mei esaki a resulta di ta un total di 50.568 turista Norte Americano cu a bishitanos. Un aumento di 5.3% compara cu 2014.

Pa lo cual ta trata e cantidad di turista cu ta hospeda den nos hotelnan esaki tambe a conoce un aumento di 18.3% compara cu 2014. Di cual 8.6% ta di e trafico cu ta procedente di Norte America.

E forma di mercadea nos isla ta pa enfoca riba e turista cu tin modo pa contribui grandemente cu nos economia. Remarcabel sigur ta cu e esfuerzonan cu ta haciendo pa eleva e calidad di turista na Aruba tambe ta hibando na un resulta positivo. Un di e formanan cu ta midi esaki ta e prijs cu un bishitante ta opta pa paga pa su estadia riba no isla. Segun AHATA e averahe di prijs pa camber a aumenta cu 12.4% y a bira $212.88 pa anochi. Un otro punto positivo pa remarca ta cu e ganashi, e asina yama RevPar a subi cu 6.3%.

Un otro forma pa midi e calidad di nos bishitantenan ta e cantidad di placa cu nan ta laga atras, e asina yama Tourism Receipts. Aki tambe Aruba a conoce un crecemento di 6.4% cu ta traduci den 2,849.60 Florin te cu final di 2014 compara cu e mesun periodo pa aña 2013.

Esaki sigur ta cifranan alentador pa e pilar economico di nos isla cu ta Turismo y ta demostra con e esfuerzonan ta traduci den exito. Minister Otmar Oduber ta felicita cada un di e protagonistanan cu a colabora na e bon resultadonan pa e industria Turistico.

Expresionnan haci den e articulo aki no necesariamente ta refleha opinion di ArenaPoliti.co