Tira piedra sconde man ta tipico di hende cu no tin curason ni weso di lomba! 

Den e siman despues di e agresion increibel di un grupo di marioneta di partido MEP contra Mike Eman, pueblo por a wak e diferencia grandi entre e lidernan di nos pais y nan partidonan. E lider di AVP y Prome Minister di Aruba Mike Eman a tuma e insulta y agresion y a demostra e humanidad grandi di nenga di contesta e agresion y insultanan contra didje cu mas agresion y insulta. Al contrario, ela condena tur forma di violencia, agresion, insulta y ofensa. E por a usa henter e aparato di su partido pa ataca tur contrincante. Pero niun momento esaki a drenta su cabez. Pasobra e sa cu esey lo hinca nos pais den un confrontacion indesea. Pio ainda, esey lo a duna forsa na esnan cu ta kere cu agresion, ofensa, insulto y intimidacion ta acceptabel den un pais liber y democratico manera Aruba. Mike ta contra tur forma di insulto y agresion y pesey no a ni pensa riba un reaccion asina.

E lider di MEP al contrario, a aplaudi y sostene e agresion, insultanan, ofensa y intimidacion di "su grupo di 7", yamando nan hendenan balente y hereonan. Su coleganan di partido a haci mescos, mustrando cu ta henter e partido MEP ta kere den violencia, agresion, insulto y intimidacion como forma normal pa nan hiba politica. E caracter di e lider di MEP y di su partido a bira mas cla, ora e mes un lider a core kita su prome comentarionan di sosten na "su grupo di 7 agresor" for di Face Book. Ela haci esey pasobra ela spanta pa e critica for di comunidad cu a bira asina fuerte asina lihe. Pueblo a condena loke a sosode! E actitud di sconde pa loke e lider di MEP a haci a bira pio, ora mas den siman e lider di MEP y otro miembronan di e partido a purba hustifica nan acto di violencia y indimidacion. Nan a hasta purba duna esun cu nan a agredi y insulta culpa pa loke nan a haci. ("No ta nos. Ta e mes a busca.") E lider di MEP a mustra su carater hipocrita ainda mas ora den sima ela bisa cu e ta contra violencia y cu violencia no ta hiba na nada bon. Den pueblo tabata tin un solo reaccion riba e declaracionnan aki: "HIPOCRITA E TA".

Partido AVP a reuni den su seno y a duna di conoce cu nan ta condena tur forma di agresion, violencia, intimidacion, insulta y gañamento manera e partido MEP ta practica pa hopi aña caba. Pero AVP a bisa tambe, cu nan no lo para man crusa. Nan lo defende e libertad di tur hende aki na Aruba pa cana y biba liber. Nan a bisa di lo pidi autoridadnan pa indica kico nan tin mester pa sigura tur hende aki na Aruba e libertad cu nos Constitucion ta ofrece. Cu esaki e diferencia entre e dos lidernan y e dos partidonan a keda bon marca un biaha mas. MEP y su lider cu pa falta di capacidad y sinceridad pa instiga y sostene agresion, insulta y intimidacion. Asina nan te kere cu nan por co'i poder na Aruba pasobra di pueblo nan no ta hay'e. Pero despues e mes un lider ta nenga di para pa loke ela haci. AVP y su lider Mike Eman, atrobe a demostra di ta para firme pa e libertad cu nos tur tin aki na Aruba y pa tene Aruba liber di e agresion manera nos ta wak den otro paisnan. Den un siman pueblo a wak un biaha mas ta ken ta para na banda di Pueblo y ken ta bringa pa nan mes. Pueblo a wak ken ta sincero y ta para pa loke e bisa y haci y ken ta "tira piedra sconde man".

Expresionnan haci den e articulo aki no necesariamente ta refleha opinion di ArenaPoliti.co