Sigui pa Acuerdonan Bilateral

ORANJESTAD – Probablemente pa fin di e luna aki Aruba y Rep. Dominicana ta firma un acuerdo pa estrecha e lasonan di cooperacion. Esaki a wordo bisa door di Minister di Estado pa Politica di Integracion Regional Miguel Mejía, kende tabata na Aruba y a reuni cu Prome Ministro Mike Eman.

Na e ocasion aki el a wordo compaña pa Consul General di Rep. Dominicana na Aruba Joselyn Rosario de Nuñez y Embahador pa Asuntonan di Caricom Juan Guiliani Cury. Na salida di e encuentro cu e prome mandatario e ministro tabatin palabra di elogio pa e bon cooperacion cu el a ricibi durante tur e encuentronan na Aruba. “Nos a bin aki cu un mensahe pa Prome Minister Eman di nos Presidente pa estrecha e lasonan bilateral entre Aruba y Rep. Dominicana, e mandatario Dominicano a expresa. El a comenta cu, mescos cu den otro biahenan oficial realisa pa Aruba, a constata hopi reciptividad di e Prome Minister cu e Presidente di su pais lo ta contento di scucha.

Basa riba tur e reunionnan cu a tuma luga na Aruba, ta probabel cu pa fin di e luna aki por tin firmamento di un “Memorandum of Understanding” cu e islanan Hulandes den Caribe. Despues cu firma e MoU aki, por sigui pa e siguiente fase cu ta negociacion y firmamento di Acuerdonan Bilateral entre Rep. Dominicana y cada un di e paisnan aki.  E meta tras di firmamento di e documentonan aki ta pa incentiva mas e cooperacion bilateral.

Aruba ya caba tin negociacion andando, por medio di Minister encarga cu asuntonan di Agricultura Otmar Oduber, pa importacion di diferente producto Dominicano. Esaki por sosode mas rapido si mira cu recientemente Hulanda a firma un acuerdo maritimo cu e pais aki, cu ta permiti un barco haci biahenan entre e pais y e islanan Hulandes. Ta trata di un biahe di 28 ora “pa e productonan Dominicano yega Aruba na un miho prijs y di miho calidad, ya cu e no mester pasa via di otro paisnan”. Esaki ta encera cu awor e productonan por wordo cumpra directamente for di e productornan y manda directamente pa Aruba. Esaki e mandatario ta considera sigur un avance den e lasonan di cooperacion cu a wordo logra entre su pais y e Gobierno di Aruba lidera pa Prome Minister Mike Eman. Probablemente prome cu fin di aña e suministro di productonan na Aruba lo por tuma luga.

Durante e encuentro cu Eman, tambe a elabora riba e intercambio di experiencia riba tereno tecnologico. A menciona specificamente e experiencia cu Aruba tin den produci gas for di resto di sushi, cu ta algo cu Rep. Dominicana ta masha interesa pa concentra su mes riba dje tambe. Tambe riba uzo di tecnologia berde riba cual tereno Aruba a logra basta avance. “E experiencia cu boso tin pa produci awa potable for di awa di lama ta algo cu nos por siña di dje mirando cu Rep. Dominicana tin pensa di adkiri e tecnologia aki. Nos hendenan mester haya educacion riba e tereno aki,” e mandatario Dominicano a expresa.

Minister Mejía a bisa cu e Gobierno di su pais no solamente ta traha pa busca apoyo y relacionnan diplomatico pero ta pone e cara humano prome, cualkier cos cu ta mehora e calidad di bida di e ciudadanonan, mescos cu ta e caso cu Gobierno di Aruba, el a duna di conoce.

Expresionnan haci den e articulo aki no necesariamente ta refleha opinion di ArenaPoliti.co