Den e tabel (abou), ArenaPoliti.co ta presenta algun cifra di eleccion, cuminsando for di e eleccion cu a determina e prome gobierno di pais Aruba despues di logra nos status aparte.

E persona cu a logra mas hopi voto ta sr. G.F. 'Betico' Croes (d.f.m.), cu 8.879 voto. E logro aki ta bira mas impresionante ora bo wak e porcentahe di tur voto cu ela logra haya. Casi 1 di cada 4 persona cu a vota na 1985, a vota pa sr. Betico Croes.

Despues cu sr. Betico Croes a fayece, un di e rumannan Henny y Mike Eman a sali vote-getter casi tur eleccion, cu excepcion di aña 2001, ora sr. Nelson Oduber a sali e vote-getter.

E partido cu a logra mas asiento durante e temporada aki ta AVP, cu a logra haya 13 asiento den eleccion 2013.
No den tur caso e partido mas grandi a goberna nos pais. E añanan cu ningun partido a logra un mayoria absoluto, coalicionnan a wordo forma cu den algun caso a laga e partido mas grandi den oposicion.

E coalicionnan cu a goberna ta:
1986-1989: AVP, PDA, ADN, PPA. Despues AD 86 a reemplasa ADN, y na 1988 gobierno a cay y a keda goberna demisionario te cu 1989.
1989-1993: MEP, ADN, PPA
1993-1994: MEP, ADN, PPA
1994-1997: AVP, OLA
1998-2001: AVP, OLA 

Klik riba e tabel pa haci'e mas grandi.

Expresionnan haci den e articulo aki no necesariamente ta refleha opinion di ArenaPoliti.co