Reunionnan ta andando na e momentonan aki na Merca cu e diferente aerolineanan cu ta bishita nos isla pa mantene e lazonan, repasa e desaroyonan y planea pa futuro.
Ronella Tjin Asjoe-Croes y Sanju Luidens- Daryanani ta representando ATA, Marisol Sanchez ta representando Ministerio di Turismo, James Hepple ta reperesentando AHATA y James Fazio y Jo- Anne Arends ta representando AAA.
CEO di ATA ta bisa cu e siman aki nan ta reuniendo cu e diferente di e partnernan clave den mercado Mericano manera ta Delta Airlines, United Airlines, Southwest Airlines, American Airlines y JetBlue. Ta trata di reunionnan cu nan ta realiza anualmente mirando cu ta hopi importante pa mantene e relacion y e contacto cu e aerolineanan y tambe evalua diferente opcionnan.
Ronella Tjin Asjoe Croes ta indica cu ultimo añanan Aruba a conoce crecemento riba crecemento pa loke ta capacidad aereo y e temporada di winter cu ta na caminda ta mustra e mesun tendencia aki.
E prome reunion cu Delta a tuma lugar caba, cual ta un partner clave specialmente pa loke ta e mercado di Atlanta y New York. Durante esaki a repasa e diferente resultadonan positivo pa loke ta e periodo tras di lomba y tambe esun cu por spera den e siguiente lunanan.
Un di e puntonan clave cu a atende cune durante e reunion ta e posibilidad di usa avionnan di mayor capacidad pa e vuelonan for di Atlanta mirando cu ocupacion di e vuelonan for di e destinacion aki ta hopi halto y ta bayendo hopi bon.
Ehecutivonan di Delta presente durante e reunion a indica cu Aruba ta un destinacion pa cual e personanan ta dispuesto pa paga un prijs mas halto pa bin y cu e destino Aruba ta sigui ta fuerte, cual ta un factor positivo pa Delta mes como socio di Aruba.
Presente na e reunion tambe tabatin esnan di Delta Vacation (esnan cu ta bende paketenan pa Delta). Nan a indica cu e promedio di prijs diario pa camber pa Aruba a bin ta creciendo for di 2014, cual ta un indicacion positivo cu tanto nos isla como Delta ta mirando y ta un indicador di e partnership positivo.
Diamars a reuni tambe cu Southwest Airlines y e reunion, mescos cu esun di Delta a bay den hopi bon ambiente unda cu a resalta e bon cooperacion cu tin cu Aruba y e bon rendimento di e mercado aki entre e clientenan di e compania.
Directora di ATA a expresa tambe cu American Airlines a pasa den varios cambio drastico. Por a tuma nota cu recientemente US Airways a a merge cu American y bira un compania bou di e capa di American Airlines. Tocante e reunion cu e aerolinea aki, el a bisa cu e ta pa mantene relacion, pa informa kico e avancenan ta mescos cu e demas aerolineanan.
Finalizando Ronella Tjin Asjoe-Croes a bisa cu por a mira un crecemento hopi positivo aña pasa, di riba 3 porciento for di Merca y pa e aña aki te cu september por mira un crecemento di 8.7 porciento. “Nos reunionnan ta confirma cu e mercado ta duna. E mercado ta uno cu nos tin proyecta pa continua cu un crecemento. Den e crecemento aki nos tin cu bisa si cu no solamente nos lo ta enfocando riba mercadonan primario, pero tambe riba mercadonan secundario cu ta duna nos e bishitantenan cu nos ta desea”.

Expresionnan haci den e articulo aki no necesariamente ta refleha opinion di ArenaPoliti.co