Oranjestad – Prome cu su salida pa Corsou Minister Plasterk di Asuntonan Interior y Relacionnan den Reino, a tene un encuentro cu prensa di Aruba den VIP-room na aeropuerto na unda el a tuma tur su tempo pa contesta e cantidad grandi di pregunta cu tabata bin den su direccion. Un di e preguntanan aki tabata si e ta di acuerdo cu loke a sali den De Telegraaf den cual Gabinete Mike Eman II ta wordo lastra formalmente. Den forma categorico el a bisa cu no. “Aki tambe ta sali cosnan den prensa over e situacion na Hulanda cu no ta cuadra cu berdad. Mi ta impresiona cu loke Aruba a haci den e ultimo añanan. Refineria Valero a cera loke tabata un golpe enorme pa economia di Aruba. Pa medio di Turismo y dor di pone enfasis riba e agenda berde, Aruba ta trata na logra e miho y cu exito.

Plasterk a defende e intervencion di Hulanda na Aruba aña pasa bisando cu mester a haci investigacionnan mas profundo pa loke ta e prespuesto y wak si e tabata realistico. E stitacion a pone e relacion entre Aruba y Hulanda e tempo ey bou hopi tension y presion. Gobernador a haya un instruccion pa no firma e presupuesto. Varios experto den Derecho Estatal a rechasa e intervencion di Hulanda y pa medio di articulo den prensa a vocifera nan desaprobacion. Raad van State a duna gobierno di Aruba y e expertonan aki rason despues di a profundisa su mes den e materia. Un estudio haci riba peticion di gobierno di Aruba y Hulanda. E bishita aki di Plasterk a bay den un ambiente mucho mas miho cu aña pasa unda a reina bon comprension. E tension ya no tey mas.      

Durante e bishita di trabou di un dia na Aruba di Plasterk casi no a discuti asuntonan financiero.,,Pesey nos tin e CAft (College Arubaans Financieel Toezicht). Nan tey pa wak si cosnan ta cana bon pa loke ta presupuestonan realistico y si ta institui un ‘meerjarenplan’ cu tin como meta pone un fin na e debe di Aruba. Como minister mi ta tene distancia awor”. Plasterk a bisa cu te awor e ta satisfecho cu CAft. ,,E preocupacionnan di e añanan anterior a traduci nan mes den un sistema nobo cu a wordo dicidi door di Aruba mes. Ta bon cu cosnan a bay asina. Ta keda na gobierno di Aruba pa dicidi con drecha e stuacion financiero.”

Expresionnan haci den e articulo aki no necesariamente ta refleha opinion di ArenaPoliti.co