SECTOR TURISTICO NO POR SIGI CARGA NOS ECONOMIA SU SO

ORANJESTAD -- Siman pasa parlamentarionan Evelyn Wever-Croes y Ady Thijsen a reuni cu sr. James Hepple di AHATA, tocante e ultimo desaroyonan riba tereno di tursimo.
"Nos a intercambia di pensamento y informacion riba diferente area, y preocupacionnan turistico. Tursimo ta mustra di ta bayendo bon, sinembargo tin varios desaroyo preocupante cu nos mester tene cuenta cun'e.
Un di nan ta e hecho cu turismo so ta cargando 80 pa 85% di nos economia ya pa un tempo. E peso aki no ta saludable, y e sector aki su so no por sigi carga e peso aki. Nos tursimo ta hopi vulnerable, especialmente pasobra nos ta depende di factornan externo. Cualquier cos cu pasa cu economia mericano por ehempel lo tin influencia grandi riba nos turismo. Pesey ta asina importante pa diversifica nos economia.
Nos reunion cu AHATA tabata uno hopi fructifero y informativo, y nos ta gradisi sr. Hepple pa duna nos e oportunidad pa intercambia di opinion" Evelyn Wever-Croes a declara.

Expresionnan haci den e articulo aki no necesariamente ta refleha opinion di ArenaPoliti.co