Practicamente e situacion na Aruba dia pa dia ta empeora mas y mas y nos pueblo no por mas cu e situacion financiero desastroso cu nos Aruba ta pasando aden. Nos homber y muhernan balente ta perdiendo trabao y otronan no por haña trabao pa cria nan yiunan. Tur dia tin empresanan ta manda trahador cas pasobra no tin cliente suficiente pa paga nan trahadornan. Pacusnan den Caya Betico Croes tur dia di Dios ta biba den tension pasobra e caya practicamente a bira solamente pa esnan grandi cu ta tuma nan dia liber pa sinta den caya, pero compra a cay bao di mas di 50%. Ariba dje desde cu a introduci parkeermeter, Caya Betico Croes a bira un caya scur te hasta den dia cla. Aruba ta pasando den su peor momento cu historia a conoce y ta bayendo riba un rumbo devastador mirando tur e debenan y medidanan (ahustacion) cu ainda falta, ta bin suta e pueblo cun’e y peor ta nos criaturanan y nan criaturanan  mester bay paga pa un debe cu nan no tin ni arte ni parte, ta simplemente un mal maneho desastroso cu nos ta pasando desde 6 aña caba di goso di placa di pueblo.


Nos Turismo: Nos turismo cu ta nos pilar principal na e momentonan aki ta cayendo dia pa dia di 5 streya cu MEP a lag’e na 2009 pa un turismo di apenas 2 streya y menos. Musiconan ta perde trabao, taxistanan ta sclama pasobra awor ta turista di skateboard, rolschaats y na pia ta drenta Aruba. Nan no ta haña cliente mas. Nos hendenan ta perdiendo trabao den sector horeca pasobra awor ta turista di fast food so ta bin Aruba. Pakico? Pasobra danki na e mal maneho y medidanan cu e Gobierno aki di AVP a pone riba nos bishitantenan y a haci Aruba como un destinacion di puro medida y caro, cu mas y mas turista no ta bin mas Aruba of esnan cu ta bin no ta tuma taxi mas y no ta drenta restaurantnan mas. Companianan di huur auto y di tour tur dia tin cu negosha prijs pa nan por sobrevivi. Comunidad di Aruba sa tur esakinan y ta rabia y ta indigna y fada cu e Gobierno di AVP cu ta esun di mas malo cu Aruba a yega di conoce.


Aruba ta sclamando pa un Lider y un Partido pa salba Aruba: Aruba na e momento aki ta sclamando mescos cu un persona cu ta sclamando pa oxigeno pa e por hala rosea pa e no muri pasobra rosea ta cabando. Na e momento aki mirando e situacion cu ta tumando lugar tin un solo Partido y un Lider cu ta boga y ta luchando pa salba nos pais di e gara aki cu Aruba ta pasando aden y e partido aki y su Lider ta sra. mr. Evelyn Wever Croes y partido Movimiento Electoral di pueblo cu si tin e plan pa saca Aruba for di e abismo cu Aruba ta aden. Sra. Wever un dama cu no solamente tin un educacion y un titulo di Meester in de Rechten pero alavez ta un señora, cu si tin experiencia di hopi aña den maneho di finansas como Inspecteur y alavez ta un mama ehemplar di un famia di un casa y di 3 yiu cu si sa con pa maneha un pais y su problemanan. Na e momento aki Movimento Electoral di Pueblo ta e alternativa pa cu e situacion na Aruba y lo sa di baha tur e gastonan y corta tur e fiestamento y biahamentonan cu e Gobierno aki di AVP ta malgastando. Lo baha e cantidad di Minister di 9 bek pa 7 y asina corta gasto cu Gobierno di AVP no kier tende pa simpelmente complace candidatonan. Movimiento Electoral Di Pueblo MEP y sra. mr. Evelyn Wever Croes si lo trece trankilidad y proteccion bek ariba nos isla y sa tambe pa trece e imagen di Aruba bek como destinacion turistico como e number 1 riba mapa mundial y lo percura pa trece alivio y confiansa bek di nos comunidad den pueblo. Movimiento Electoral Di Pueblo MEP y mr. Evelyn Wever Croes ta cla p’e tur dia, abo ta cla p’e?

Expresionnan haci den e articulo aki no necesariamente ta refleha opinion di ArenaPoliti.co