ORANJESTAD - Minister di Desaroyo Economico Eugène Rhuggenaath a haci un bishita na Aruba e siman aki. Rhuggenaath su bishita a cuminsa mainta tempran caba cu un recorido na waf nobo na Barcadera, sigui pa encuentronan cu Minster di Turismo, Transporte, Sector Primario y Cultura Otmar Oduber y Prome Minister di Aruba, Mike Eman.

E bishita na waf tabata na encargo di Aruba Ports Authority NV (APA NV) y ASTEC cu ta e dos instancianan encarga waf nobo di Barcadera.

Durante e bishita na e waf di container nobo, Minister Rhuggenaath a felicita Aruba cu realisacion di e proyecto importante aki y a ricibi splicacion amplio riba e manera cu Aruba a desaroya e modelo di ta doño di e waf. E mandatario a haya un splicacion cu den e ultimo añanan Aruba Ports Authority (APA) y Aruba Stevedoring Company NV (ASTEC) a haci inversionnan grandi den infrastructura nobo. APA a construi murayanan di waf nobo y ASTEC a inverti den otro e tereno di waf, kraannan, edificionan y sistemanan automatisa. Tur dos partido ta hopi entusiasma den cuadro di e cooperacion pasobra esaki a resulta den un reparticion transparente di responsabilidadnan y un separacion cla di tareanan.  

Despues di e bishita na waf, e mandatario, kende tin apenas tres luna den e funcion aki, tabatin un reunion cu Minister Oduber, unda e tema principal tabata creacion di strategia conhunto pa aserca companianan crucero y asina fortifica e posicion di negociacion di ambos pais.

Despues e tabatin un encuentro cu Prome Minister Eman, prome cu e almuerso cu Conseho di Ministro, kende e conoce di pasado caba y den e encuentro aki a recorda combersacionnan di pasado y mas cu tur cos con por yega na mas cooperacion entre Aruba y Corsou manera e Prome Minister Eman semper ta bisa den su discursonan. Esta di kier crea un miho sistema di cooperacion den Reino. Algo cu Minister Rhuggenaath ta di acuerdo cu ne pasobra “hunto nos ta para mas fuerte”, el a expresa.

Den oranan di atardi e mandatario a biaha caba bek pa Corsou pasobra den curso di diabierna e tabatin un reunion importante cu Staten di Corsou.

Expresionnan haci den e articulo aki no necesariamente ta refleha opinion di ArenaPoliti.co