ORANJESTAD – Durante conferencia di prensa di MEP diaranson ultimo lider di MEP Evelyn Wever-Croes tambe a toca e polemica di ‘all inclusive’.
“Tur experto a duna di conose cu Aruba no por carga mas all-inclusive, AHATA, ATA, ATIA, y gobierno tambe ta bisa esey. Sin embargo awor cu ta momento pa Gobierno actua, nan ta sinta un banda y laga otronan actua. Esey no ta pas pa un gobierno. Aruba merece un gobierno cu ta tuma liderazgo, cu ta goberna, cu ta pone interes general prome cu cualquier interes di sponsor di campanja.
Pero den henter e polemica aki ta parse cu e gobierno di AVP tin miedo, y esey no ta bon. Miedo di kiko? Di pone un paro na all-inclusive? Miedo di sponsor di campanja?
Nos kier mira gobierno actua cu pasonan firme den bienestar di nos pais. No tin espacio pa miedo di esaki. Pueblo di Aruba merece mihor, mucho mihor” líder di MEP a expresa.

PARLAMENTO
A puntra sra. Wever-Croes kiko Parlamento mes por hasi. “Parlamento a pasa un mocion unanimamente caba pa pone un paro na all-inclusive, y nos sa cu gobierno a laga hasi un estudio. Pero ta parse cu gobierno no ta tene cuenta cu e mocion aki di Parlamento. Den un caso asina ami a verwacht cu e presidente di e comision di turismo sra. Jennifer Arends-Reyes lo a yama un reunion urgente di siman pasa caba ora e noticia di RIU y Radisson a lek, pa asina enfatisa e posicion di Parlamento. Pero aparentemente e tema aki no tin proiridad serca e fraccion di AVP. Ta pesey nos a opone ora nan a exigi e puesto di presidente di e comision ey, pasobra anja pasa Dangui Oduber tabata presidente, y den un caso asina e si lo a yama un reunion urgente cu e Minister. Lamentablemente e mayoria den Parlamento ta den man di esnan cu no ta mustra mucho interes den tur e problemanan ni desafionan cu tin riba e tereno di turismo, nos unico pilar economico”.

REFINERIA
E mesun actitud miedoso nos a mira cu e refineria. Aki tambe e gobierno di Mike Eman, cu a priminti cu lo habri e refineria bek, a sinta un banda, manera cu miedo y manda tur hende pa Valero. Gobierno mes no a hasi intentonan concreto pa logra habri e refineria. E mesun actitud iresponsabel enfrente e refineria, nos ta mira awe enfrente e all-inclusive. Y ta di comprende si sponsornan di campanja tin otro interes, pero esaki ta e momento cu e gobierno di nos pais mester bisa e sponsornan di campanja: para un rato, te aki nos a yega, awor ta interes di e pueblo di Aruba mester bai prome. Esey nos ta pidi, pasobra Aruba merece mihor, mucho mihor, segun Evelyn Wever-Croes.

Expresionnan haci den e articulo aki no necesariamente ta refleha opinion di ArenaPoliti.co