Ya for di aña 2010 bin padilanti, y tambe siman pasa y e siman aki, UPP a mustra riba su preocupacion pa loke ta regarda autonomia di Aruba. Esaki a base di e acontecimentonan cu ta tumando lugar den Reino y cu poco poco ta dunando UPP e conviccion cu ta cabando cu e Status Aparte cu nos a conoce y cu a trece asina hopi desaroyo positivo pa Aruba y su pueblo.

Asina nos por ripiti atrobe e ultimo traicion di 2 di mei 2015, unda cu Prome Minister Mike E., hunto cu Minister di Finanzas Angel B., a firma un protocol minando e.o. Parlamento di Aruba su autoridad.

Nos a mustra caba riba e intencion di Hulanda pa bin cu un asina yama “Integriteitscommissie” cu lo tin e mesun tareanan, y probablemente e mesun mandato cu Cft tin actualmente. Un comision cu lo ta ancra den un Decreto di Reino y cu Conseho di Ministro di Reino ta nombra. Es mas: durante e ultimo IPKO esaki tambe nos a comprende cu a bolbe bin dilanti.

Tambe nos a menciona caba e insistencia “nobo” Hulandes pa pusha nos cu un UPG, ya cu segun D66 e status aki tin mas beneficio pa Aruba enbes di LGO actual.

UPP ta cuestiona e modus operandi di e partidonan politico Hulandes, unda di un banda nan kier impone cambionan, ‘zogenaamd’  pa mehora e relacion entre e partnernan di Reino, pero na e mes un momento ta sera dealnan cu paisnan den e regio di Caribe, demostrando asina cu nan ta haci locual di curazon nan kier, esta sirbi nan propio interes.
Pues nan meta ta e bienestar di Hulanda y no mehoracion di e lazonan entre e partnernan..

Un prueba di esaki ta e acuerdonan cu Minister di Salubridad Hulandes a sera na Colombia pa tratamento medico pa islanan di Caribe Hulandes y Hulanda. Ironia di bida ta cu na e mesun momento na Aruba tur minister di salubridad di Reino ta presente pa delibera con pa mehora e cuido medico y reduci e gastonan.

Pero parce cu ainda Parlamento ta sinti cu tin tempo pa trata e "landsverordening" (e texto di e ley aki ya ta skirbi y parlamento NO por trece ningun cambio aden tampoco) na unda lo mina e autoridad di parlamento. Kizas pasobra e gobiernonan di Reino y Aruba por conta cu un apoyo di 13 parlamentario cu no mester di mucho tempo pa aproba e ley aki? Un paar di dia prome cu 1 di augustus ta mas cu suficiente, pasobra ya caba a custumbra con ta bulldoze esaki door di Parlamento?

UPP ta puntra dicon, despues cu Ministro Presidente Mike E. a bin duna cuenta, despues di a sera e protocol cu Gobierno di Hulanda, Parlamento den un forma mas acelera no a bay over na trata e Protocol Anti-Parlamento di 2 di mei ultimo?
Dicon Parlamento of miembronan di Parlamento no a cuminsa busca e consehonan necesario pa mira te con leu un protocol manera firma, por mara Parlamento di Aruba?
Dicon Parlamento, mirando cu ta e ley (cu by the way a wordo skirbi door di ambtenaarnan hulandes na Den Haag caba) cu ta wordo proponi pa e mecanismo di control di CAft, no a discuti ainda e embergadura di esaki pa e poder y autoridad di Parlamento y su derechonan (manera budgetrecht, amendementsrecht, etc.)?
Dicon Parlamento no ta tene encuentronan cu instancianan pafor di Parlamento pa asina wak ki draagvlak tin pa e tornumento na e autoridad, derecho y poder di Parlamento?

UPP ta kere cu Parlamento, sigur loke ta e fraccion di AVP, for once and for all, mester mustra cu Parlamento ta esun cu di berdad ta e organo mas halto di nos constitucion, y cu mas bien mester “roep” e ministernan y gobierno completo “op het matje”, pa loke a keda conveni. Henter e protocol aki mas bien ta mustra cu ta tur hende, incluso Parlamento di Aruba, mester entrega, mientras cu e gobierno actual y su secuasnan ta keda intacto. Nan si ta sigui djodjo te ora cu no por mas.

UPP ta haya cu desde 2013 ora Parlamento a sinta, mester a percura pa hearings y townhall meetings, pa asina a intercambia cu gruponan den nos comunidad tocante kico nos comunidad, nos pueblo ta spera di un Parlamento.
Pero lastimamente e oloshi ta canando, y parce cu Parlamento lo bay ta sacrificando su propio autonomia, dor di no kier para e gobierno di Mike E. cu ta cabando cu e pais aki y cu nos autonomia.

UPP ta ripiti: Aruba MES mester percura pa soluciona e problema financiero, economico y constitucional prome! Parlamento mester tuma su posicion, y manda Gabinete Mike E. cas, conveni un Cumbre Nacional, y hunto cu tur actornan stipula un lista di prioridadnan riba tereno financiero-economico, tereno di gobernacion, fiscal, y politico, alabes nos sistema electoral, pa despues nombra un Gabinte transitorio di crisis of di emergencia nacional, cu hunto cu Parlamento ta tuma e decision necesario pa nos pais.
Y djey sali bay Hulanda pa hiba un negociacion habri, transparente y sincero cu Gobierno Hulandes.
Ta e forza catalisador aki di union nacional Arubano, ta haci cu nos por enfrenta e retonan nos dilanti y ta evita cu nos ta bay mas den abismo.



Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, juni 4, 2015

Expresionnan haci den e articulo aki no necesariamente ta refleha opinion di ArenaPoliti.co