Mientras cu e presupuesto 2014 ainda no a wordo firma door di nos gobernador, y minister di finansas mester cumpli cu e obligacion, segun e palabracion entre Plasterk y Mike E, firma dia 3 di juli 2014, pa tuma e recomendacionnan integralmente over proponi door di e secretariado di Cft, na Aruba e gobierno ta sigui cu su “propaganda” y “promesanan”:

1. Mike Eman lo cumpli pa dedica 12 miyon florin, cu no ta presupuesta, pa paga e gelijkbedrag y bashi-premie na nos pensionadonan.

2. Minister Paul Croes ta firma un MoU cu e Stichting Kennis en Advies Centrum Arbo (SKACO), un centro di conocimento cu specialisacion riba leynan pa seguridad y salud di empleadonan y leynan laboral.

3. N.V. Elmar, Utilities Aruba N.V. y Gobierno di Aruba a firma un Memorandum of Understanding (MoU) cu e compania LED Roadway Lighting Ltd di Canada. E plan ta pa reemplasa tur e luznan di caya rond Aruba y añadi mas of menos 12 mil palo/instalacion di luz mas na e cantidad existente.

4. Gobierno di Aruba a firma e MOU cu e grupo Piñero cu ta propietario y desaroyador di e hotel cu lo bin na Seroe Colorado.

Loke a yama mas mi atencion ta e dos projectonan “innovador” cu a drenta den operacion e siman aki. Ta trata di:

1. E projecto “Waste to Energy” di EcoTec. E planta ta ricibi e sushi cu Ecotech ta recolecta y ta transforma esaki den gas y e ta bay via un conexion cu tin caba pa WEB pa wordo uza na luga di fuel oil. Den diferente publicacion mi a denuncia e projecto aki, na unda a kita e posibilidad di nos compania estatal Serlimar di ehecuta e projecto aki, y a permiti Ecotech desaroya esaki sin cu a tene un destaho public, y na unda WEB lo mester a inverti alrededor di 9 miyon florin pa completa e tuberia entre WEB y EcoTec. Mientras tanto pueblo lo mester paga e suma di 25 florin pa recohe e desperdicio di cas, pa Serlimar na su turno regala Ecotec esaki pa convertiele den gas pa Ecotec si bai cobra p’e.

2. ELMAR a haci un inversion di 11 miyon Dollar Mericano cu e compania PFixx pa construccion di un parke solar na nos aeropuerto. E projecto aki no a cuminsa riba un bon pia. Sin cu a duna ningun tipo di splicacion, a termina e contract (no Mou) cu ELMAR y Mike Eman a firma dia 5 di september 2012 cu e compania hulandes Oskomera Solar Power Solutions BV pa construccion di e parke solar pa medio di un partnership publico priva (PPP). Y den medionan di comunicacion nos a wordo informa cu dia 22 di april 2013 un contract pa diseña y construi e Parke Solar a wordo firma entre ELMAR y e compania local Pfixx Solar. E compania LOCAL aki ta inscribi na Camara di Comercio na nomber di sr. Milton Harms.

Lagami kita tur duda di esnan cu lo por tin e impresion cu mi tin algo contra inversion di companianan local na e desaroyo economico na nos Pais. Alcontrario nos situacion financiero actual ta asina malo cu inversionnan ta di suma necesidad, pero dicon semper e mesun inversionistanan, y pakiko no ta tene cuenta cu nos propio companianan estatal y tambe nos comerciantenan chikito cu mester ‘struggle’ pa por sobrevivi y nunca lo por competi cu e ‘groot kapitaal’.

E motibo di mi preocupacion cu e comerciante chikito no lo haña un fair chance, ta e declaracion di sr. Fons van Pul, director di Pfixx. El a duna di conoce di ta willing pa inverti ‘entre 10 y 30 miyon pa un otro projecto hunto cu companianan local. El a agrega cu kisas Gobierno por indica unda nan kier tipo di projectonan asina, of tin hopi parkeerplaats unda autonan ta para henter dia den e solo cayente cu tambe por wordo uza. E por ta supermercadonan of otro companianan priva grandi. E compania ta simplemente bende e coriente cu ELMAR cu ta distribui esaki’. SIMPLEMENTE bende e coriente cu ELMAR, un comerciante na Aruba tambe lo por haci, ya cu su inversion no lo core ningun peliger, y e placa lo keda aki.

Ta yega tempo cu e gobierno aki y sigur Utilities, WEB y ELMAR cuminsa duna cuenta di nan actonan. Pueblo tin e derecho pa sa cuanto a inverti den su totalidad den e Green Conferencenan y tambe den construccion di e parke solar na nos aeropuerto. Principalmente si mester a paga e compania Oskemara daño y perhuicio pa e kiebro di e contract.

Nos a bin ta experiencia un gobierno corupto cu no ta ria pa haci promesanan fofo y cu ta keda hinca nos pueblo den un desaster financiero sin misericordia. E ta nos deber di keda vigila Mike E, y no permiti mas manipulacion, intimidacion y destruccion di nos Estado di Derecho, pasobra di e 13 parlamentarionan marioneta di e partido AVP no mag di spera nada constructivo. TA E PUEBLO SO POR SALBA E PUEBLO!!

Den nomber di Union Patriotico Progresista – U.P.P.
Candelario – Booshi – Wever
Brazil, october 23, 2014

Expresionnan haci den e articulo aki no necesariamente ta refleha opinion di ArenaPoliti.co