No ta husto cu tin hende mester warda 7 anja, y otronan ta warda 3 siman! 

ORANJESTAD – Durante conferencia di prensa di MEP diaranson ultimo lider di MEP Evelyn Wever-Croes a expresa su preocupacion pa un desaroyo peligroso na Aruba, pa loke ta trata terenonan cu ta wordo duna na Aruba.

“Nos a wordo acerca pa hopi hende cu tin problema cu esaki, especialmente pasobra nan no sa kiko ta nan derechonan. Tin hende cu a pidi un pida tereno banda di nan cas, y ta wardando esaki pa por expande nan cas, pero no tin fin di haya contesta di DIP. Anto awor diripiente nan ta mira otro hende cuminsa construi riba e tereno cu nan a pidi hopi anja pasa.
Den e ultimo luna aki so mi a haya 4 caso asina pa atende durante mi oranan di consulta y bishita den bario. Loke mas mi ta lamenta ta cu ora e hendenan aki a bai busca informacion con a para cu nan peticion, ta wordo bisa na nan cu ta Minister a dicidi pa duna e otro hendenan e tereno, sin tene na cuenta e peticion entrega mucho mas prome.

3 siman
Otro fenomeno cu a causa hopi rabia den comunidad ta hendenan cu a aplica pa tereno 3, 5, 6 pa 7 anja pasa, y te awe ainda no a tende nada, pero un hende cu apenas a yega Aruba un tempo pasa, den 3 siman a haya su tereno. E trato inhusto aki a causa hopi hende pa rabia, y cu rason.

2 tereno pa parlamentario den Colony
Y nos no mester lubida tur e casonan cu a keda expone durante tratamento di presupuesto di terenonan pa e amigonan di minister Sievinger, y di parlamentarionan cu a haya 2 of mas cas den Colony pa su yiunan, un situacion di conflicto di interes sumamente serio.

Pesey mi ta urgi Minister Sievinger publica su maneho di otorgamento di tereno, pa asina tur hende sa kiko ta su derecho. Mientras tanto esaki ta hustamente un di e temanan cu Ministerio Publico mester tira su bista riba dje pa mira si tin cosnan fraudulento a tuma lugar”, segun Evelyn Wever-Croes.

Expresionnan haci den e articulo aki no necesariamente ta refleha opinion di ArenaPoliti.co