A tuma nota recien di un articulo di Minister Otmar Oduber den cual e ta elabora riba crecemento economico cu supuestamente ta depende 90% riba Turismo. Sinembargo den e articulo aki e no a logra presenta e base con el a yega na tal conclusion. Na prome lugar e indicador principal di economia di un pais ta wordo midi pa medio di GDP. GDP na su turno, en todo caso e metodo aplica na Aruba ta e metodo di gasto, ta consumo (di e pueblo y turismo) mas inversionnan, mas gastonan di gobierno, mas e resultado di exportacion y menos importacion. Pues pa deduci cu turismo so ta influencia GDP na un pais cu 90% e minister aki mester presenta mucho mas dato of indicador cu simplemente ADR, Revpar y Tourism receipts. Alabes e minister ta haci como sifuera cu – debi na e echo cu e refineria ta aporta cu 10 pa 12% na nos GDP – e restante lo ta atribui completamente na e industria di turismo, siendo cu tin mas componente cu ta influencia e GDP aki.

Tambe por a nota cu Minister Otmar Oduber ta purba compara resultadonan di turismo di aña 2014 cu 2009 cu tawata e aña cu mundo henter a sinti e efectonan di un recesion economico, pues naturalmente por spera di dje cu e lo desea di compara of show su mes haciendo esaki. Historicamente Aruba su mihor aña den e mundo turistico tawata aña 2008 y mirando cu segun e gobernante aki turismo a kibra tur record durante su maneho lo ta mas apto pa e compara resultado di aña 2014 cu aña 2008.

Mirando e cifranan presenta adhunto por tuma nota di diferente indicador pa aña 2014 y pa aña 2008, ademas di e porcentahe diferencia entre nan dos.  Por nota cu GDP di pais Aruba ainda no a logra yega e nivel di 2008, alcontrario te ainda tin un discrepancia di 3.0%.

Enberdad e cantidad di bishitantenan stayover a subi cu 29.7% di 2008 pa 2014 mientras cu loke Aruba ta ricibi na entrada di turismo (tourism receipts) compara cu e mesun temporada aki a subi cu solamente 18.1%.  Por tuma nota cu e sector di hotel, ta Revpar so a logra subi cu 2.0% den 2014 compara cu 2008 y pa loke ta trata ocupacion y ADR, nan nivel ta e mesun nivel practicamente cu aña 2008. Loke ta remarcabel ta e echo cu e budget cu awe Aruba ta goza di dje pa haci mercadeo si a subi substancialmente cu 440% (!) y esaki ta solamente basa riba informacion di aña 2013 compara cu 2008. Pues por conclui atrobe cu apesar cu e cantidad di bishitantenan a subi cu casi 30%, e cantidad di placa cu nan ta laga atras na Aruba no a subi cu e mesun porcentahe. Si por conclui – analisando e diferente resultadonan aki - cu si e placa cu Aruba tin pa haci mercadeo awendia ta rendabel (return on investment), por bisa claramente cu esaki no ta e caso mirando e crecemento gigantesco di e cantidad di placa cu Aruba tin na su disposicion pa mercadia Aruba awendia.

Expresionnan haci den e articulo aki no necesariamente ta refleha opinion di ArenaPoliti.co