Nos Pais for di basta tempo no ta conta cu un Minister President pa por duna guia, pone ordo y splica kiko ainda Pueblo por spera di e gobernacion di su gabinete. Sigur na e momento aki cu varios medida ta keda imponi na nos Pais, nos Pueblo tin e necesidad di mira nos Minister President dirigi su mes na Pueblo y splica kiko ta su plan pa saca nos Pais di e problemanan cu nos ta enfrentando. E ausencia di nos Minister President ta wordo sinti no solamente den Pueblo, pero tambe den instancianan importante di nos Pais. Nos ta sigur cu den e propio seno di gobernacion tambe nan lo mester ta haya falta di un Minister President pa duna guia, pone ordo y splica kiko ainda falta.

Salesman pa Hulanda
Mester remarca cu nos Minister President casi nunca ta na Aruba, ya cu mayoria tempo e mandatario ta pasa den exterior bishitando foronan internacional. Ultimo mes ta na United Nations nos Minister Eman ta cana rond pa haci propaganda pa Reino (Hulanda) a haya un stul den e Conseho di Seguridad di Nacionnan Uni. Ta parce cu nos Minister Eman ta hinca tur esfuerso pa por haci e trabou di salesman pa Hulanda, pero su propio trabou mes di lidera gobernacion y tuma decicion na bienestar di nos Pais ta wordo neglisha grandemente.

No ta tuma decicion
Pa colmo ora cu Minister Eman ta na Aruba e ta dedica su tempo solamente na verf, chapi y cana den bario. Di e manera aki decicionnan importante pa nos Pais no ta wordo tuma. No ta pornada cu CFT a remarca den nan rapport, cu Minister Eman mester tuma ‘ownership’ di e situacion financiero di nos Pais y bay na cabes di un comicion pa guia e proceso pa por yega na un presupuesto balansa y un finanzas publico manehabel pa nos Pais. Banda di esaki den rapportnan di Raad van Advies y Algemene Rekenkamer tambe ta wordo remarca cu e gobierno aki mester stop di papia y cuminsa actua. E instancianan aki tambe ta sinti cu decicionnan na bienestar di nos Pais no ta wordo tuma y esaki ta perhudicando nos Pueblo.

Pone ordo
Pero mas principal, nos mester un Minister President pa pone ordo na nos Pais. Tin hopi cos ta bayendo robes ya cu e Ministernan ta haciendo locual cu nan kier. E Pueblo ta wordo suta cu medida. No tin seguridad laboral y riba dje criminalidad ta lanta cabes. Den un situacion asina Pueblo lo kier mira nan Minister President asumi su responsabilidad di guia nos Pais, pone ordo den su gobernacion, y splica e Pueblo aki kiko ainda nan por spera di su gobernacion. Un barco mester su capitan pa evita cu e ta pega riba baranca na man di matroos.


22 otkober 2015

Expresionnan haci den e articulo aki no necesariamente ta refleha opinion di ArenaPoliti.co