Un gran Cantidad di barconan crusero grandi a cancela nan callsnan pa Aruba pa e anja aki!

Algun siman atras commission fiho di turismo di parlamento a reuni cu AHATA y a trata diferente topico di interes ariba nos turismo. Den e reunion aki a sr menciona cu e anja aki turismo crusero lo sufri un sla duro cu un caida grandi den e cantidad di barconan crusero.
Minister Otmar Oduber na un forma arrogante a sali y defende su mes y desmenti esaki. E la bisa cu esaki no at berdad y contrario na loke a wordo bisa den e reunion cu AHATA e cantidad di callsnan (barconan crusero cu lo bin nos pais)  e anja aki lo conoce un aumento di 3. Den mesun rosea miembro di fraccion di AVP den parlamento y alavez presidente di e commission fiho di turismo den parlamento a bisa cu e cantidad di callsnan lo conoce un caida di 24 barco. E otro miembro di fraccion sr Chris Dammers a completa e asunto y bisa cu e anja aki turismo crusero no lo conoce ni aumento ni caida sini lo sera e anja flat. Aki por wak con structuralmente partido AVP ta malinforma, manipula y ganja nos pueblo cu e cifranan di turismo crusero.
Na momento cu minister Oduber a tene su conferencia di prensa y a informa communidad di Aruba cu e cantidad di callsnan e anja aki lo conoce un aumento di 3 barco e tawata sa cu e ta ganjando nos pueblo. E tawata bon na altura caba na e momentonan ey di e schedule di APA y segun e schedule di APA aki e cantidad di callsnan lo conoce un caida dramatico e anja aki. Pakiko Otmar Oduber ta scohe toch pa malinforma y ganja nos pueblo mi no sa. Lo ta bon pa e splica pueblo pakiko e no ta gusta papia e berdad. Si algo ta bon bise pero ora algo no ta bayendo bon mester informa pueblo debidamente tambe.
Pa e anja aki barconan crusero grandi manera Royal Carribean Cruiselines, Norwegian Cruises, Princess Cruiselines, Holland America Line y Pullmantour tur a cancela un cantidad  di callsnan pa Aruba. Recientemente, Gemini tambe a cancela algun calls tambe, causando asina un disminucion den comparacion cu un proyeccion planea pa e aña aki, compara cu 2014.
Segun e schedule di APA N.V. te na e momentonan aki Aruba lo sufri un caida drastico den e cantidad di callsnan pa nos pais. Kende ta responsabel pa cu esaki? Pakiko tur e cruseronan aki a cancela nan callsnan pa Aruba?
Kiko ta wordo haci pa atrea mas barco crusero pa Aruba? Den pasado semper Otmar Oduber a culpa e gobierno awor den e caso aki kende ta esun culpable y responsabel?
Cu e caida dramatico aki economia di Aruba sigur lo wordo afecta. Tur esnan cu ta gana nan pan cu e turistanan crusero lo wordo confronta cu un anja sumamente dificil pa loke ta trata turismo crusero.
Aki bou e schedule di APA N.V. cu e cantidad di calls nan di anja 2014 compara cu e cantidad di callsnan di anja 2015. Cada ken por huzga pa nan mes si e cantidad di barconan crusero lo bira mas of lo bira menos.

Schedule Cruise Ships APA N.V. 2014 vs 2015

Cruise Lines	APA N.V. 2014	APA N.V. 2015	Diff	%
Celebrity (RCCL)	10	9	-1	-10%
Holland America Line	31	29	-2	-6.5%
NCL (Norwegian)	11	5	-6	-54.5%
Princess Cruiselines	50	40	-10	-20%
Pullmantur	47	43	-4	-8.5%
Royal Caribbean	43	38	-5	-11.6%
Thomson	7	2	-5	-71.4%
TUI Germany	7	4	-3	-42.9%

Si compara e schedule di APA N.V. di anja 2014 y esun di anja 2015 por wak cu e anja aki cu gran camtidad di barconan crusero grand a cancela un cantidad di calls pa Aruba. Princess Cruiselines a cancela 20% di callsnan pa Aruba e anja aki compara cu anja 2014.
Mi ta reta Otmar Oduber pa bin demostra lo contrario y bn bisa pueblo dikon den promer instante a ganja cu e cantidad di callsnan lo subi cu 3.
E schedule aki ta e proyeccion cu tin te na e momentonan aki cu nos ta na comienzo di maart 2015.
Nos ta sumanente preocupa cu e desaroyo aki y ta urgi minister pa busca solucion pa e problema structural aki. Di anja pasa caba e cantidad di callsnan a bin ta birando menos, anja a habri cu un caida di 20% y awor segun e schedule lo ta un anja hopi dificil pa nos pais pa loke ta trata turismo crusero. Minister Otmar Oduber mester stop di pretende y ganja nos pueblo cu turismo ta bayendo excelente pasobra e sa cu esaki no ta e caso. Na januari 2015 tawata un crecemento segun Otmar Oduber di 20.7% pero loke e no a bisa pueblo ta cu 7000 di e turistanan aki tawata turirstnan cu a keda Aruba solamente un anochi! Otmar Oduber a decepciona nos pueblo un biaha mas cu su mentiranan pasobra mientras e ta bisando pueblo cu e anja aki lo tin crecemento den cantidad di barconan crusero e schedule di APA N.V. ta demostra lo contrario!

Expresionnan haci den e articulo aki no necesariamente ta refleha opinion di ArenaPoliti.co