Conferencia di Reino ta tuma luga awe na Corsou 

ORANJESTAD - Den oranan di dialuna atardi Prome Minister Mike Eman a biaha pa Corsou na unda diamars e Conferencia di Reina ta tuma luga.  Na e conferencia aki lo ta presente Vice Prome Minister di Corsou van der Horst, Prome Minister di Sint Maarten Gumbs, Minister Plasterk di Hulanda y Prome Minister di Aruba Eman. Temanan riba e agenda ta: cohesion den Reino, geschillenregeling, cuido medico, cooperacion economico den Reino, derechonan di  mucha y paisnan chikito cu retonan grandi. Temanan cu Aruba sigur a traha duro riba nan durante e cinco añanan tras di lomba. Idea, vision y plannan innovativo di e actual gobierno ta yega den tur huki di  mundo. Durante e conferencia e siman aki Prome  Minister di Aruba por mira bek riba 5 aña di su gobernacion.

Agende di sostenibilidad
Aruba ta conoci pa ta e isla cu ta cana dilanti den Reino pa loke ta innovacion. Hopi idea cu e gobierno a trece dilanti y  a ehecuta ta haya admiracion rond mundo. Gabinete Mike Eman na 2009 a introduci un  agenda di sostenibilidad cu a haya gran acogida. Mision di e actual gobierno ta pa Aruba na 2020 ta independiente di petroleo fosil. Un vision cu a pone Aruba riba mapa mundial. Cinco aña pasa e agenda berde no tabata un tema interesante, sigur no den tempo di crisis. Ta p’esey cu ningun hende tabatin confiansa den e mision aki. Pero wak awe, Aruba ta hayando reconocimento dit tur parti di mundo y ta wordo considera como un ehempel pa otro paisnan.

Balor adicional di Reino
Na momento cu Gabinete Mike Eman I a sinta Prome Minister Eman a enfoca grandemente riba e balor adicional di Reino y con haci uzo di esaki. Un tema cu cinco aña pasa no tabata haya e atencion necesario, sigur no despues di un periodo cu e relacion cu Reino tabata bou hopi presion. Hopi a hari y a pone e pensamento aki un banda. Awe, cinco aña despues, hasta Hulanda ta mira y acepta e balor adicional di Reino. E mision comercial pa Brazil y Top di OAS na Panama unda Eman a guia delegacionnan di Reino ta prueba di esaki. Tambe e lobbymento di Hulanda pa Aruba yuda nan logra un asiento den Nacionnan Uni ta papia pa su mes.  

Hub
Cinco aña pasa gobierno di Aruba a bisa comercio Hulandes cu si nan kier probecha di e crecemento economico den Latino-America, nan mester haci uzo di Aruba como trampolin. Ningun hende tabatin mucho confiansa den e idea innovativo aki. Awe, cinco aña despues mas y mas empresa Hulandes ta scoge Aruba como hub pa haci negoshi den Latino-America. Mientrastanto, Corsou y Boneiro tambe ta profila nan mes como hub. Tin un rapport riba mesa (SEO-rapport) cu ta confirma e balor di e islanan como hub. Un bes mas Aruba a cana dilanti. 

Preclearance
Cinco aña pasa gobierno di Aruba a expresa su deseo pa tin un preclearance cu por wordo ofreci na pasaheronan cu ta biaha di Aruba pa Hulanda. Di biaha e vision y deseo aki a wordo bari di mesa argumentando cu esaki no ta factibel. Awe, cinco aña despues KLM, Schiphol y Hulanda ta partner di Aruba den e asunto aki. Boneiro tambe kier participa awor. Na Bruselas tin algun barera pa supera, pero ya caba Aruba a start cu algo unico den mundo, e proyecto piloto: Happy flow.

Geschillenregeling
Cinco aña pasa gobierno di Aruba cu a caba di sinta a lucha pa haya un asina yama ‘geschillenregeling’ pa Reino. Cinco aña largo a wordo negosha riba modelonan. Modelonan cu no tabata cuadra cu loke Aruba tabata kier desde un principio. Te cu un par di siman pasa ainda no tabatin indicacion cu Aruba lo a haya e tan desea areglo aki. Te ora cu e delegacion di Aruba durante reunion di IPKO a bisa pa wak un bes mas na e prome sugerencia di Aruba. Esaki a pasa y awe e geschillenregeling a wordo introduci.

Cuido medico
Un otro punto cu ta wordo trata durante e conferencia ta cooperacion den Reino riba tereno medico. Aruba a tuma rienda den e asunto aki y a trece tur partido hunto – inclusivo e mandatarionan responsabel riba e tereno aki – y e base a wordo poni pa tuma pasonan cu algun aña pasa ainda tabata mustra imposibel.  

Aruba a demostra na mas di un ocasion di ta traha den forma innovativo y diligente y aunke cu hopi bes e idea, vision y plannan no ta mustra factibel, despues di insisti nan ta resulta fructifero. E pruebanan ta riba mesa.

Expresionnan haci den e articulo aki no necesariamente ta refleha opinion di ArenaPoliti.co