Despues di conferencia ‘Green Aruba - Where Europeo Meets the Americas’ (GA-EMA), Francisco Palmieri a expresa na prensa su admiracion grandi pa Aruba y tambe pa Prome Minister Mike Eman pa e forma con el a pone Aruba riba e caminda di durabilidad, birando un ehempel no solamente pa e region, pero tambe pa resto di mundo. Francisco Palmieri ta un di e funcionarionan di mas halto cu a bishita Aruba den e ultimo añanan. Palmieri ta representante di Departamento di Estado Americano y ta traha primariamente cu enfoke riba America Central y Caribe.

Den un entrevista, Sr. Palmieri a splica, "Nos ta sigui cu hopi interes loke ta tumando luga na Aruba. Prome Minister Eman ta posicionando e isla como un pais cu un bista nobo pa futuro. Nos ta mira un maneho cu ta dunando resultadonan berdadero y nos sigur kier brinda nos apoyo na algo asina." Durante un encuentro algun luna atras cu Prome Minister Eman na Washington, Palmieri a sigura cu Gobierno di Merca ta hopi interesa pa contribui na GA-EMA y e funcionario Mericano a participa den e conferencia tambe como orador. 

Palmieri a expresa tambe cu Gobierno Mericano ta considera Aruba un ehempel pa region ora cu ta papia di maneho di energia durante di un forma cu otro paisnan por siña hopi di dje. "Nos ta mira na Aruba con partnernan ta wordo treci hunto cu e meta pa pensa riba y crea forma pa baha gasto energetico y controla esakinan. Cu esaki nos kier coopera, door di busca posibilidadnan di financiamento y brinda ayudo tecnico." El a bisa cu Gobierno Mericano lo sostene cu incetivonan pa yuda Aruba realisa su meta di ta completamente sostenibel pa 2020. "Nos ta mira Aruba como un partner. Nos ta bay traha estrechamente cu e Gobierno y si aki ta crea posibilidadnan pa companianan Mericano inverti, nos ta apoya esaki."

Door di e posicion cu Palmieri ta ocupa den Departamento di Estado di Merca, e ta hopi bon na altura di tur loke ta pasando den region riba tereno di energia. "Loke cu Eman ta haci aki ta unico. E ta crea e condicionnan y trece partnernan hunto, p'asina energia duradero ta wordo integra den e sistema di coriente. Esaki ta percura cu menos placa ta wordo gasta den compra di combustibel tradicional. E placa cu ta keda, por wordo bon uza pa stimula e economia."

Na final el a bisa cu no ta cuestion cu Aruba ta hiba un rol di liderazgo den region riba tereno di energia. "Aruba ya caba ta un ehempel pa region y pesey nos kier apoya e isla."

Expresionnan haci den e articulo aki no necesariamente ta refleha opinion di ArenaPoliti.co