Lider di MEP Evelyn Wever-Croes a manda un comunicado di prensa relaciona cu varios notificacion cu el'a ricibi cu studiantenan na Hulanda cu ta den problema serio. E problema ta ocasiona pasobra gobierno di Aruba no a manda placa pa nan di Arubalening, y como tal nan ta algun mil euro den cora caba. Tin studiante cu no por ni come drechi, y ta core riesgo di perde nan anja, djis pa mal maneho di gobierno. Y mas tristo ta cu ni kiko Arubahuis hasi, nan tampoco por yuda e studiantenan.

"Mi ta puntra mi mes ta unda e prioridadnan di e gobierno aki ta? E fin di siman aki ta cantidad di minister ta bai biaha atrobe, incluyendo e propio minister di ensenjansa. Tin placa pa ministernan biaha cu delegacionnan grandi di coordinador y fotografo, pero no tin placa pa duna nos studiantenan. E cos aki ta increible, pasobra aki na Aruba Mike Eman y su ministernan kier pretende cu tur cos ta bon, mientras nos tin yiunan di tera sufriendo na Hulanda, djis pasobra gobierno no kier manda nan placa. Nos fraccion lo hasi pregunta na Minister y exigi e Minister di Ensenjansa duna cuenta na Parlamento. No por ta posibel cu nos tin henter un siman ta cuestiona e minister, y ta manera cu e ta morto na sonjo. Mas aun, pasobra e minister aki ta paga un compania di mercadeo miles y miles di florin pa skibi cantidad di articulo p'e na papiamento. Pero tur ta keto.

Unda e 8.2 miyon euro ta cu a bin di Union Europeo? Na kiko el'a wordo gasta? Dicon e regimen di Mike Eman ta inverti poco menos di 2 miyon florin den ensenjansa pa anja, mientras cu e gobiernonan di MEP tabata inverti mas di 7 miyon pa anja na ensenjansa? Dicon ainda nos tin studiante ta warda pa haya nan studielening di Aruba, y cu awor por wordo perhudica den nan estudio? Dicon Minister di Ensenjansa no ta atendiendo cu e problem serio aki?

Nos ta spera di haya contesta riba termino hopi cortico di e Minister en cuestion", segun Evelyn Wever-Croes.