Gobierno di MEP a inverti 7 miyon pa anja den ensenjansa, gobierno di AVP menos di 2 miyon florin!

Lider di MEP Evelyn Wever-Croes a trese padilanti su preocupacion cu e falta di inversion den ensenjansa. Ya pa hopi tempo no ta duna atencion necesario na ensenjansa, y pesey tin asina tanto problema cu scolnan, cu nivel di ensenjansa y te hasta cu diplomanan ta core peliger.

Lider di MEP a referi na e Statistical Yearbook 2013 cu CBS a publica riba nan website, den cual bo por lesa con poco placa e gobierno aki ta inverti den ensenjansa mes.

"Mi no ta papiando di e gastonan di por ehempel salario, eseynan ta 'government expenditures', y eseynan ta subiendo cada anja. Pero mi ta papiando di e inversion real, formacion di capital. Si mi compara e promedio di locual gobiernonan di MEP tabata inverti, tabata 7 miyon florin pa anja, siendo cu asina cu AVP a sinta, ela baha entre 1 pa 2 miyon florin pa anja.

E relato anual di CBS ta mustra ta dicon nos ta den asina tanto problema cu nos scolnan y cu como consequencia cu nos studiantenan ta wordo perhudica. Entre otro na Colegio San Antonio, Colegio San Agustin, Colegio Frere Bonifacio, Rosa College, Arco Iris Kleuterschool, etc. Mientras cu te dia di awe e scol HAVO/VWO na Noord no ta hayando atencion.

Esaki ta splica tambe dicon nos tin problema nan awor cu nos diplomanan di HAVO.

Mi ta lamenta cu nos studiantenan ta esunnan cu mester paga e cuenta di mal gobernacion, y di prioridadnan equiboca. Minister Eman kier desaroya Aruba y hasie un economia a base di consemento "kennis economie", pero con bo ta logra esey si no e diploma di HAVO of VWO por wordo garantisa aki poco anja? Ta parsemi mas prudente pa e gobierno aki aterisa y para cu ambos pia riba tera, inverti den nos ensenjansa, y despues sigi sonja", palabranan di Evelyn Wever-Croes.

Expresionnan haci den e articulo aki no necesariamente ta refleha opinion di ArenaPoliti.co