Na anja 2012, segun lider di MEP, Aruba a haya 8.4 miyon euro for di Union Europeo pa inverti den ensenjansa. Cual ta equivalente na 21 miyon florin.

Esaki ta resultado di trabounan hopi intensivo cu ex minister di finansa sr. Nilo Swaen a hasi durante periodo di gobernacion di Gabinete Nelson Oduber. Una bes sr. Swaen a logra haya e compromiso ey por escrito, a designa e placa pa ensenjansa. Sinembargo e ehecucion di e compromiso ey no a tuma lugar prome cu sr. Swaen a baha como minister, e pago mes a tuma lugar na anja 2012.

Sinembargo segun Evelyn Wever-Croes ningun hende por mira kiko a pasa cu e 21 miyon florin ey. Pasobra nos scolnan ta sigi den masha mal condicion. Colegio San Antonio por ehempel ya ta dos anja casi cu nan a muda, pero nada a wordo hasi na e scol ainda. Otro scolnan ta sigiendo den mesun pasonan, Colegio Frere Bonifacius, Rosa College, Colego San Agustin, Arco iris Kleuterschool, etc. Y esaki ta perhudica nos studiantenan.

Ademas, desde cu Mike Eman a tuma gobernacion, y a neglisha ensenjansa completamente ni un scol nobo a wordo traha. Mike Eman tin 5 anja caba ta gasta placa den tur otro cos, pero ni 1 scol e por a laga traha.

Sin conta mes di e proyecto HAVO/VWO di Noord, cu tabata cla pa wordo ehecuta na anja 2009, pero di cual tur a placa a wordo hinca den e proyecto di tram.

Awor te hasta e nivel di nos diplomanan ta core peliger, studiantenan cu awor ta den Havo 4 por ehempel no sa si e diploma cu nan ta luchando pe, lo tin balor ora nan caba di studia.

Si Mike Eman kier desaroya Aruba pa bira un "kennis-economie" mi ta puntra mi mes ta pa ken e ta desaroyando esey, pasobra cu e direccion cu nos ensenjansa ta bayendo, nos futuro generacionnan no por carga ningun "kennis-economie". Un economia basa riba "kennis-economie" lo beneficia solamente expertonan di exterior.

Pa tur e motibonan aki pueblo tin derecho di sa kiko gobienro a hasi cu e 21 miyon florin cu nan a ricibi di Union Europeo na anja 2012. Fraccion di MEP lo keda investiga, lo bolter tur piedra, te haya contesta riba e pregunta aki, lider di MEP a laga sa.

Expresionnan haci den e articulo aki no necesariamente ta refleha opinion di ArenaPoliti.co