Varios biaha bo ta tende parlamentarionan di AVP papia di un situacion caotico cu a keda atras na 2009. Contrario na loke AVP ta bisa E dilema financiero cu hopi tempo tawata bou di disputa door di parlamentarionan di AVP y nos di oposicion a haya un confirmacion desde cu e KB a mira lus di dia. E instancia independiente CFT a conclui cu di berdad e dilema financiero ta uno sumamente grandi y cu lo tuma nos pais hopi anja pa recupera for di esaki. Lamentabel ta cu den solamente 5 aña di gobernacion di AVP nos pais su finansas publico a conoce un deterioracion cu nunca antes den historia di nos Status Aparte a yega di sosode. Palabranan manera deficiencia, incapacidad, irresponsabilidad, inconfiabel  y falta di vision sigur ta esunnan cu ta keda bini padilanti y a conberti nan mes den seyo fiho pa loke ta trata Gabinete Eman.

Rapport di CFT ta indica cu crecemento di gastonan tawata uno drastico pero tambe e caida den entrada di belasting ta pone cu e deficitnan financiero di nos pais ta keda crece y automaticamente pone cu nos debe nacional ta aumenta. E desaroyo di nos debe nacional y e solo hecho cu esaki a redobla y ta alrededor di 80.7% ta uno sumamente alarmente pa nos pais chikito. Institutonan internacional manera IMF y CFT a indica cu e margen pa un pais manera Aruba ta financieramente sostenibel lo mester ta alrededor di 40%. Remarcabel ta cu e percentahe aki lo no bai conoce cambio tampoco a corto plazo. Den e rapport di CFT un analisis ta wordo hasi di 4 diferente scenario pa te na anja 2040 nos yega na normanan aceptabel pa cu nos debe nacional. Puntra bo mes si ta husto cu den solamente 5 anja Gabinete Eman a “jeopardize” e futuro di Aruba? Claramente esaki ta un senjal cu cosnan a bai robes bou di e gabinete aki! Pa colmo for di e rapport di CFT bo por saka afor cu e “plan” di balanced budget akkoord lo ta uno cu lo no tin su balor agrega debi cu esaki tawata incompleto y no ta tene cuenta cu hopi otro aspecto entre otro desaroyonan di gastonan relaciona cu proyectonan ppp pero tambe crecementoo natural di gastonan peronal. Tambe bo por conclui cu e plan no ta tene cuenta cu posibel golpinan economico (inespera ) cu nos pais lo por sufri y cu de facto lo no por afford e sla aki. Akinan ta unda cu nos pais ta vulnerabel pasobra ya caba nos tin un “negatieve eigen vermogen”.

Medidanan
Pueblo di Aruba a conoce caba un pakete di medida cu ya caba ta na vigor pero e magnitud di e problema financiero di nos pais ta uno asina grandi cu lamentablemente e cuidadanonan di Aruba promer cu anja 2014 caba y na inicio di anja 2015 lo conoce medidanan aun mas rigoroso di parti Gabinet Eman. Falta di prioridad y seriedad den gobernacion a causa cu por ehempel cu e cuidadano ta pagando gastonan extra di azv (eerste hulp, huisartsenpost). Como sifuera poco BBO lo bai conoce un aumento debi cu lo bai cobra pa AZV por haya fondo. Sin kita afor e hecho cu nos pais anjanan tras di otro tin deficitnan structural ta pone cu no tin placa pa inverti ni traha nada! Awor falta di responsabilidad a pone cu gobierno a anuncia cu e kier crea un fondo di inversion unda cu e cuidadano su placa ta wordo ranca (sin cu e tin opcion) pa por traha projectonan cu de facto ta sigui coba nos “graf” financiero. Según parlamentarionan di AVP diferente di e medidanan aki lo ta pa pa cubri gastonan specifico. Pregunta cu ta surgi ta : pakiko e cuidadano mester bai paga mas siendo cu e ta pagando su fair share caba cu impuesto? E contesta ta uno facil e ta pasobra AVP a malgasta fondonan publico na un manera iresponsabel y cu awor no tin placa pa hasi nada mas! Y enbes di hasi ehercicionan pa reduci den diferente caminda entre otro ministernan, coordinadornan, gastonan lucrativo ta opta pa pone ABO cuidadano paga pa nan erornan pa despues por bisa cu nan a traha algo bunita somewhere. Un cos ta sigur si cosnan di berdad ta bon nunca niun cuidadano lo mester a confronta  medidanan sacrificando nan cartera pa un gobierno sin piedad keda engrandese e dilema financiero aki.

Ta di lamenta cu un maneho deficiente tin awendia como consecuencia cu medidanan pisa lo sigui wordo implementa y ta netamente e pueblo lo tin cu paga pa e erornan di un gabinete y su parlamentarionan cu ta co-autornan di e desaster financiero.Dentro di poco (entre november y december) un cantidad di medida lo ta vigente sin exclui esunan cu lo ta aplicabel desde 2015. Tur e medidanan aki ta consecuencia di un maneho cu a kibra “record” pa ta uno devastador pasobra esakinan ta wordo confirma door di e rapport hasi door di College financieel toezicht.

Expresionnan haci den e articulo aki no necesariamente ta refleha opinion di ArenaPoliti.co