Rapport di final di CFT a keda cla y esaki a wordo entrega na Gobernador , Gabinete Eman pero tambe gobierno dj reino. Remarcabel ta cu den principio gobierno lo tawatin 3 siman pa dicidi riba esaki y pa bai saca su som con e ta bai ahusta e presupuesto 2014. Aparentemente nan a tuma un decision pa loke ta trata e contenido y a hasi entrega di un presupuesto 2014 cual nan a yama presupuesto supletorio.

Presupuesto modifica
Despues cu ya caba e tawata un hecho cu ta CFT ta e instancia responsabel pa ehecuta e control y evualuacion di e presupuesto 2014 y proyecionnan di futuro hopi persona a specula over e posibel "outcome" y e proceso. Ironico y incomprendibel tawata e hecho cu parlamentarionan di AVP tawata hasi como sifuera nada malo a pasa y tawata expresando cue e presupuesto 2014 ta un "gepasseerd station". Awe pisca ta muri pa nan boca pasobra kier of no mester trata e presupuesto 2014. Algo di remarca tambe ta cu Ministernan den Gabinete Eman a jame e presupuesto uno supletorio. De facto e parti supletorio ni mester bini padilanti y of ta aplicabel pasobra nunca Aruba tawatin un presupuesto 2014 aproba y pa colmo e presupuesto original mes tawata un ehempel di deficiencia y iresponsabilidad pa cu nos finansas.

Parlamento no a hasi su trabou
Ta obvio cu e aprobacion di e presupuesto original 2014 tawata un eror grandi den historia di Aruba. Ademas e ta bisa hopi di e 13 parlamentarionan cu ciegamente a sostene cifranan cu tawata totalmente irrealistico y incompleto. E solo hecho cu mester bai cambia e presupuesto ta un muestra cu parlamentarionan no a cuestiona , studia y a hasi nan trabou manera debe ser. Hasta bo por conclui cu modificacion di prespuesto 2014 ta sinonimo di incapacidad di parti parlamentarionan cu a aprobe. Ta di lamenta cu Parlamento no ta controla gobierno sino solamente ta djis sigui un maneho iresponsabel y deficiente sin pensa riba e consecuencianan grandi cu esaki por tin pa ful un comunidad!

Expresionnan haci den e articulo aki no necesariamente ta refleha opinion di ArenaPoliti.co