Den e ley di presupuesto 2014  Gabinete Eman a presenta su intencion pa institui un Fiscal council

den 2015 cual lo ta un organo encarga principalmente cu control y re-enforsa cumplimento cu reglanan presupuestario cu lo bai wordo incorpora den nos “staatsregeling”. Segun Gabinete Eman e organo aki lo bai duna conseho riba conceptonan di ley ora ta trata di presupuesto di pais Aruba cual lo ricibi esaki promer cu Raad van Advies duna su evaluacion. E organo lo conta cu 3 persona cual 2 lo wordo nomina door di parlamento y uno di gobierno di reino. Gabinete Eman a laga sa cu CFT lo wordo involucra como un consehero di e fiscal council pa anualmente duna un raportahe di experto.

E instituto di supervision financiero CFT a duna di conoce cu esaki kizas lo por bini aserca en adicional pa yuda parlamento pero cu lo no tin garantia cu e fiscal council lo por fungi como un organo di control independiente. Incorporacion di reglanan presupuestario lo no ta suficiente pa garantisa cumplimento di parti gobierno. E hecho cu lo kier hasi uso di experticio di CFT a riba un base annual lo no garantisa  cumplimento di e reglanan tampoco y  cualkier rapport di CFT lo por wordo bari for di mesa cual despues por resulta den problemanan sin cu por a evita esakinan.

Nos di oposicion tambe ta pensamento cu e fiscal council cu Gabinete Eman lo kier institui ta uno cuestionabel pa diferente motibo. Na promer lugar Gabinete Eman nunca a cumpli of mantene su mes na reglanan presupuestario manera ta stipula entre otro door di ley di comptabilidad. Na varios ocasion durante gobernacion di Gabinete Eman nos organonan di conseho manera Algemene Rekenkamer y Raad van Advies tawata señala e iregularidadnan  cometi pero tur biaha esakinan a wordo ignora tanto door di Gabinete Eman y parlamento (speficamente fraccion berde).  Es mas incumplimento y violacion di e leynan aki nunca a conoce un consecuencia pe mandatarionan y tampoco nan a duna señal di mehoracion. Awor kiko ta pone AVP pensa cu awor si lo bai cumpli cu e reglanan aki ? Hecho ta cu nan mes tur e tempo a hasi y deshasi! E solo hecho cu ta nan mes lo bai apunta esnan cu lo bai forma parti di e fiscal council aki no ta dunabo confiansa at all pasobra e lo no ta imparcial ni independiente!  

Expresionnan haci den e articulo aki no necesariamente ta refleha opinion di ArenaPoliti.co