Fondo Monetario Internacional (IMF) ta considera 40% como e nivel maximo di debe pa un pais cu economia chikito manera esun di Aruba. E desaroyo di e deficitnan presupuestario despues di aña 2018 ta determinante pa asina nos por logra baha nos debe nacional na nivelnan internacionalmente aceptabel. Den e rapport di CFT diferente scenario a wordo treci dilanti pa por logra reduci e debe bek na 40% di nos Producto Domestico Bruto (GDP). Pues na e mesun nivel cu gobierno di MEP a laga atras na 2009!

Presupuesto balansa

Den e scenarionan presenta (e desaroyo di nos finansa publico 2019 y adelante) a tuma como punto di bista entre otro 1) cu pa 2018 nos pais lo a logra un presupuesto balansa y lo keda mantene e liña di maneho aki 2) anualmente e economia di nos pais lo ta creciendo cu 3%. Ademas ta spera cu e crecemento automatico den e aparato gubernamental por bay wordo maneha debidamente. Den comunicadonan anterior nos a informa pueblo cu pa por logra un presupuesto balansa pa 2018 lo rekeri un pakete di medida structural di 265 miyon di 2014 pa 2018. Si encaso esaki no sosode e lo tin un efecto negativo riba e quota di debe nacional y lo bay dura ainda mas pa logra un debe sostenibel.

Cuater scenario

E grafico aki bou ta mustra cu den tur scenario e lo dura añanan largo prome cu e nivel di nos debe nacional yega cerca di 40%. Tur cos ta depende tambe si logra efectua e medidanan corespondiente y logra e presupuesto balansa na 2018. E promer scenario ta indica cu si nos pais keda logra un presupuesto balansa despues di 2018 y goza di un crecemento di economia di 3% tur aña esaki lo hasie posibel pa logra baha e debe nacional te na alrededor di 40% te na aña 2040! Relaciona cu esaki ta di remarca

cu pa aña 2014 mes Banco Central a calcula un crecemento economico di  3.4% pero despues na maart 2014 esaki a wordo baha na 2.7% y recientemente ahusta na 1.6%. Den principio cifranan asina aki ta bou di e nivel rekeri pa nos pais por cuminsa su caminda di recuperacion. E ahustacion di e crecemento economico (baha) pe 2 añanan aki ta indicabo cu e proceso di yega na un finansas sostenibel tecnicamente por hasta bira despues di 2040!   

E segundo scenario ta ilustra cu si tin un surplus den nos presupuesto di 0.5% di nos Producto Domestico Bruto (GDP)  tur aña despues di 2018 e meta lo wordo logra na 2034 y si esaki ta 1% tur aña lo logra esaki na 2031.

Finalmente CFT a inclui un scenario tambe unda cu reduccion di gastonan di interes na mitar lo tin como efecto cu e nivel di debe nacional lo bay baha mas rapido. Esaki lo ta posibel si encaso por logra haya re-financiamento cu tarifanan cu ta mitar di loke semper a haya. Si e ehercicionan aki wordo haci, pais Aruba lo por logra su meta di tin un finansa y debe sostenibel di 40% alrededor di aña 2028.

Lamentablemente e ultimo accionan di e gobierno aki  ta mustra cu NO lo kier tuma e opcion pa refinancia nos debe nacional cu interesnan mas abou. Ehempel recien di esaki ta cu gobierno a bai fia placa na Corsow cu un tasa di interes di 5% mientras cual no ta un interes faborabel. Hulanda mes a propone un alternativo cu lo por trece un alivio door di refinancia nos debe nacional y cu interesnan reduci. Pesei e ta incomprendibel y nos ta lamenta cu e confrontacion di parti Gabinete Eman ta continua cu Hulanda.

Medidanan

Pa termina, ta obvio cu e scenearionan aki riba ta un reto riba nan mes y cu nos problema financiero ta uno mas grandi di loke tur hende a imagina. Esaki ta pone automaticamente cu nos presupuesto no por carga otro pesonan adicional y gobierno conscientemente a opta pa bay saca placa for di e ciudadano introduciendo tur tipo di medida (contribucionnan propio AZV, Healtx tax, Financial transfer tax, vuilheffing) pasobra e situacion financiero no ta duna espacio pa cumpli cu loke normal tawata cumpli cune. Como hoben politico mi ta lamenta cu Gabinete Eman a crea den un periodo asina cortico (solamente 5 aña!) un dilema financiero cu no ta facil pa recupera for di dje. Ademas mi ta spera tambe cu futuro gobiernonan di Aruba realisa cu finansa publico no ta un wega y cu esaki por hiba un pais pa su destruccion y ta causante di medidanan riba lomba di pueblo!

Expresionnan haci den e articulo aki no necesariamente ta refleha opinion di ArenaPoliti.co