Hunto cu e presupuesto 2014 gobierno mester a inclui tambe e calculacionnan multi-anual p’asina por haya un bista di nivel di realidad, contenido y desaroyo pa asina por yega na un presupuesto balansa. Den un resumen Gabinete Eman a presenta e deficitnan financiero 2015-2018. Segun e cifranan presenta pa aña 2018 lo tin un surplus den e presupuesto. Esaki ta nifica cu e medidanan pe añanan 2015-2018 cu lo bay wordo implementa lo ta mas riguroso. Den e presupuesto 2014 a implementa 2 medida cual lo bay pone cu na 2018 lo tin 170 miyon na extra entrada. Banda di esaki a implementa 22 medida (cortamento den diferente ministerio) cu lo laga gobierno spaar 440 miyon florin.

E instituto di supervision financiero CFT na promer lugar a remarca cu mayoria di e medidanan no ta poco concreto (no defini) y e calculacionnan di loke gobierno lo bay spaar durante e añanan a keda falta. Tambe a indica cu e splicacion duna den diferente componente di e medidanan no ta cuadra cu loke a wordo presenta den e presupuestonan multi-anual. A base di loke a wordo presenta den e presupuesto 2014 e no tabata posibel pa CFT evalua si e cifranan multi-anual lo ta realistico y factibel (evalua cu si di berdad Gobierno lo por logra esaki). Den bista di CFT e adaptacionnan haci no a a bay di acuerdo cu e recomendacionnan den e rapport di investigacion.

Nos di oposicion ta di pensamento cu loke CFT a trece padilanti di e cifranan multi-anual ta pruebanan palpable cu Gabinete Eman no a siña su les cu el a haya di presupuesto 2014. E solo hecho cu varios biaha ta keda presenta cifranan incompleto sin ningun splicacion extenso con lo realisa esakinan ta bisa suficiente  con e maneho deficiente pa loke ta trata nos finansa publico ta keda tuma lugar.

Expresionnan haci den e articulo aki no necesariamente ta refleha opinion di ArenaPoliti.co