Awor cu nos yegando fin di aña, ta bon pa haci un analisis di e situacion en general aki na Aruba, y kiko gobierno a haci entorno esaki.

For di fin di aña 2009, nos por a tuma nota cu Gabinete Eman 1 a haci tur nan esfuerzo pa desacredita e gobernacion anterior cu storianan cu te cu dia di awe no tin fin di yega na un final.

En bez di a sigui cu e maneho di austeridad cu ex-minister Swaen tabata hiba percurando cu e quota di debe a keda dentro di e norma di 40% di nos GDP y un deficit di 3%, na fin di 2009 a cuminza cu un maneho di Sinterklaas y di derochamento di placa, comosifuera Aruba ta un pais cu rikesanan natural inmenso. A yena Aruba cu klinkers, a regala Valero miyones, a habri porta pa tur clase di hende, sin ningun tipo di screening, a percura pa Valero a sera su portanan, tabata sera contractonan sin ningun clase di destaho publico, djies pa complace cu financistanan di nan campaña miyonario, y tur esaki acompaña cu un endeudamento di nos Pais nunca bisto den historia. A redobla e debe den un periodo record di 4 aña. Tur esaki cu ayudo di gremionan comercial y sindical y tambe organonan official. Y particularmente e prensa comprometi.

Ningun, pero ningun di e proyectonan of e regalonan aki, no tabata tin un efecto positivo pa nos desaroyo socio-economico, al contrario. Nos pueblo na 2014 y 2015 tin cu hala faha mara pa por sobrebibi despues cu awor Mike E. a habri porta pa CFT bin dicta ki medida mester ser tuma aki na Aruba. Mike E. a haci nos pueblo mas pober, ela percura pa no tin trabow pa nos yiunan di tera, ela percura pa NO tin placa pa nos grandinan, ela percura pa mayornan mester bay paga extra pa educacion di nan yiunan, a percura pa corta den e pakete di AZV, ela percura pa nos yiunan di tera mester traha te na un edad di 65 aña, a hisa e prima di AZV, a aumenta BBO pa paga mafiosonan di Miami, ela percura pa aumenta e tarifa di coriente cu 15%, etc. etc.

Ora cu e invitadonan di Mike E. (CFT) a impone e medidanan cu ta azotando nos pueblo, cu ayudo y aprobacion di Mike E. y su gang, nos a kere cu Mike E. lo a siña su les di derochamento di placa y lo stop cu esaki, pero nos ta riparando cu Mike E. ta sigui cu su maneho di crea un isla di fantasia "EMANLANDIA"!!

Ta sigui pinta cosnan manera cu nos no tin debenan cu lo horca nos y hiba nos den un abismo, cu lo hiba nos den un situacion pio cu Grecia, Italia, Portugal y Spaña hunto.

Mike E. por haci esaki pasobra e tin un gran mayoria di prensa ta siguiele ciegamente mescos tabata e caso tempo di Hitler, Papa Doc of Idi Amin, y nan cada un sin excepcion ta ricibi fabornan for di Mike E. E prensa comprometi aki ta percura pa pueblo no ta wordo bon informa, al contrario nan ta percura pa pueblo ta keda ignora e realidad. Gobierno ta suta e pueblo cu medidanan sin misericordia pa sigui yena saco di mafiosonan y esnan cu a financia nan campaña, y sigui paga e mesun prensa, y e prensa comprometi aki ta bisa cu ta pa inversion esaki ta. E prensa aki sa hopi bon cu tanten cu nan por keda percura pa e pueblo keda ignorante pa e realidad, nan por keda probecha, y e gobierno di Mike E. por sigui manipula e pueblo. No ta pornada e gobierno aki NO ta inverti den educacion, pasobra Mike E. sa cu educacion ta e vacuna contra ignorancia.

Ignorancia ta mata un pueblo, ta p’esey mester mata e ignorancia. A bira tempo pa nos cuminza grita y sapatea;  si nos no haci esaki e prensa comprometi lo bay bisa cu nos pueblo merece loke nos ta hayando y nan lo haci tur loke ta na nan alcanse pa pueblo stima esnan cu ta masacrando nos cu medida, y odia esnan cu ta lucha contra e abusadornan aki. Nos mester lucha contra e gobierno y e podernan cu ta masacrando nos pueblo. Esun cu lucha tin e chance di por perde, pero esun cu NO lucha, ya caba a perde. E unico manera cu e gobierno aki y nan defensornan por subi nos cabez, ta si nos dobla nos lomba. P’esey e lucha mester ta firme y cu determinacion.

Pa motibo di e maneho financiero desastroso di Mike E. desde fin di 2009, e pueblo tin un sed enorme y loke Mike E. ta ofrece na e pueblo ta un botter di awa bashi (EMANLANDIA). Y e prensa y e gremionan ta bisa e pueblo pa bati man pa Mike E. pasobra por lo menos Mike E. a duna e pueblo un botter. E tipo di manipulacion aki nos mester caba. Corda cu ta Dios so ta pordona, ignorancia NO. Ta p’esey e lucha no mester ta contra Mike E. y su gang so, pero tambe contra tur esnan cu ta manipula hunto cu e gobierno aki. Manera tin un dicho ta bisa: "Un pueblo ignorante ta instrumento ciego di su propio destruccion"!!

Wel, ta den man di nos pueblo Arubano pa para e desaroyo aki. Ban caba cu loke ta matando nos pueblo.

TA E PUEBLO SO POR SALBA E PUEBLO.


Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, december 9, 2014

Expresionnan haci den e articulo aki no necesariamente ta refleha opinion di ArenaPoliti.co