Durante un entrevista, Parlamentario pa Partido MEP, sr. Guillfred Besaril, a duna su reflexion relaciona cu e sucedidonan cu a tuma lugar durante e manifestacion di dia 1 oktober ultimo. Sr. Besaril a declara lo siguiente:

"Partido MEP tin un respet profundo pa e polisnan uniforma cu a traha durante e manifestación di dia 1 di Oktober 2014. Nan tolerencia y dedidacion pa mantene e orden publico tabata simplemente admirabel. Pa es motibo aki E ORDO duna pa implementa e Riot Commando contra e manifestantenan ta totalmente INCOMPRENDIBEL pa nos Fraccion! Durante weekend cu a pasa nos Fraccion a tuma e tempo necesario pa analisa diferente video. A probecha na combersa cu diferente manifestante y agentenan policial cu tabata na e sitio,. Esaki tabata necesario pa por a formula un opinion lo mas obhetivo posibel di e sucedido. Nos conclucion como Partido ta, cu na NINGUN MOMENTO e agentenan uniforma no a perde control di e situacion durante e manifestacion. Pues na ningun momento tabata tin un situacion claro cu por hustifica e desicion pa hasi uso di e Riot Commando!

Un ehempel den cual dicho implementacion lo por tabata hustifica, ta den e caso cu si e manifestantenan REALMENTE lo a drenta ocupa Bestuurskantoor of a causa daño REAL na propiedad priva. E decision no por ta basa riba un "NAN DI" of "NOS A TENDE!" Nos no ta ciego pa e hecho cu tabata tin cierto manifestantenan cu no a comporta nan mes na un forma debido. Ta berdad cu tin cierto funcionarionan cu lo mester bai responde personalmente pa nan actonan. Pero na mes momento nos a constata cu TUR TUR loke a sosode y cu Awe nos ta lamenta, a tuma lugar una bez cu dicidi di hasi uzo di e Riot Commando contra e publico dilanti bestuurskantoor.

E derecho na manifesta ta un libertad cu ta nace for di e derecho na e libertad di expresion. Pues den e caso aki ta trata di un derecho sagrado di Pueblo cu di un forma abrupto a wordo trapa. Nos di Movimiento Electoral di Pueblo enfáticamente kier accentua, di ta compronde y respeta e trabow di Polis. Pero, si nos compara dia 1 di Oktober 2014 cu e situacion cu a presenta su mes na Madre Patria Hulanda, riba Dialuna dia 6 di Oktober ultimo, caminda cu 125 demostrante "Koerdo" a drenta y "Take Over" e edificio di Parlamento (2e Kamer) Hulandes, nos NO por keda sin cuestiona e ordo duna aki na Aruba. Den e caso na Hulanda, muy apesar cu e manifestantenan a irrumpi den e edificio di 2e kamer, Polis na un manera tactico y pacifico a intermedia den e situacion. Y pa 2'or di marduga (ora di Hulanda) a logra pa tur e manifestantenan "Koerdo" hostina bandona e sitio na un forma civico.

Nos Fraccion a tuma nota di e declaracion di ciudadano Minister di Husticia. Den su declaracion e mandatario ta admiti cu ta basa riba cierto informacion, estacu algun manifestante lo tabata tin mal intencion, entre otro di bolter un auto cu turista aden y kime, hasta cu algun persona cu tabata cana den cierto forma rond cu obhetonan cu por a wordo uza como arma, a dicidi di implementa e Riot Commando. Abase di e diferente videonan por conclui (y mi ta subraya loke a wordo menciona anteriormente) cu en todo caso nos por cunclui un solo cos: na NINGUN MOMENTO por constata cu polis uniforma a perde control di e situacion! Y ta p'esey nos Fraccion ta cuestiona e ordo duna na e Riot Commando.

Fraccion di MEP a manda un serie di pregunta por escrito na Gobierno y lo keda en espera pa un respuesta por escrito di e mandatarionan. Na momento di ricibi un contesta of no, e siguiente paso lo ta di pidi un reunion publico den Staten cu TUR e Ministernan responsabel tanto pa Orden Publico y Husticia. Na final di dia tanto e Pueblo cu a manifesta, Gremionan den nos Comunidad y Cuerpo Policial a keda pega cu e sabor amargo di un decision cu a bin di "ARIBA!" Partido MEP no por acepta e hecho aki, ya cu un hende na mi humilde opinion, mester carga e responsabilidad Politico pa e ordo cu wordo duna y tur e mal sabor cu esaki a laga atras despues di loke awe den Pueblo ta wordo yama e "Prome di Oktober Scur", Parlamentario Besaril a termina.

Expresionnan haci den e articulo aki no necesariamente ta refleha opinion di ArenaPoliti.co