Nos a tuma nota di un articulo di prensa di Minister Eman den cual e mandatario ta pidi opocicion pa cambia e forma di trece e informacion dilanti tocante e supervicion financiero di CFT, ya cu esaki tin biaha ta trece confucion den comunidad. Nos mensahe na Minister Eman ta, desde ki dia e berdad ta confundi un Pueblo? Pasobra ta e manipulacion di e Gabinete aki lidera pa e mesun Minister Eman aki ta locual ta trece e confucion berdadero den e Pueblo di Aruba.

Elimina BBO
Dunando e comentario aki Minister Eman ta manera lubida cu ela campania y gana eleccion na 2009, manipulando e Pueblo cu e promesa di elemina BBO. Minister Eman a demonisa BBO culpando BBO pa tur problema di Aruba. Ta hopi hende a kere Minister Eman y a brinde e confiansa di voto basa riba e mentira aki. Y awe Pueblo mester para wak con Minister Mike Eman mes ta bay hisa BBO mas cu 4%. Acaso esaki no ta confundi un Pais?

No tin MEGADEBE
Ta ken no ta corda con Minister Eman a declara cu nos Pais no tin MEGADEBE y cu pesey no mester bin medida of ahustacion manera e ta yame? Minister Eman a yama MEP pa partido di medida. Ta con nos mester yama tur e medidanan cu Gabinete Eman a pasa scondi tras di Dialogo Social? Y ta con ta yama e 24 medida cu Gabinete Mike Eman ta bay pasa den 2015 y tur esnan cu ainda falta pa drecha e desaster di e MEGADEBE? Pasobra si no tin MEGADEBE pakiko mester bin medida riba Pueblo anto? Minister Eman, dunando medidanan e nomber di ahustacion, reforma, decicion, snoeien etc. ta simplemente manipulacion y esey ta locual ta confundi e Pueblo di Aruba!

CFT over my dead body
No ta Minister Eman a bisa tempo di su welga di hamber cu ‘over my dead body’ Aruba lo haya CFT? No ta Minister Eman ta esun cu a bisa cu e ta lucha pa nos Status Aparte y cu elo bay te Nacionnan Uni manera Betico Croes pa defende esaki? Anto awe ta e mesun Minister Eman ta esun cu a firma tur tipo di protocol pa entrega nos Status Aparte pida pa pida bek cu su mal maneho. E tabata dispuesto pa muri pero ta e mesun Minister Eman ta esun cu a firma e Protocol di 2 mei 2015 pa CFT bira activo na augustus 2015. Esaki ta otro prueba di e manipulacion di Minister Eman cu tin e Pais aki confundi.

Gobernante humilde
Awor Minister Eman kier manipula mente di e Pueblo aki bisando cu e ta goberna na un manera humilde. Un hende cu ta lidera un Gobierno na unda cu e ta ‘double up’ e debe di e Pais creando un MEGADEBE hasta pa e baby cu nace awe, NO ta goberna humildemente. Un lider cu ta manda cacho y RIOT comando riba hoben y grandinan di e Pais aki, NO ta un gobernante humilde. Mas aun, un lider cu ta provoca un Pais, hinke den pobresa djies pa acomoda sponser di campania y despues ta bira ignora y haci cherche di e Pueblo su dolor, NO ta un gobernante humilde. Alcontrario, un lider asina ta un simpel dictador disfraza na un homber di Pueblo. E tipo di manipulacion aki ta locual ta confundi un Pais, teniendo su Pueblo catibo na mentiranan cu ta lew di e berdad cu opocicion ta trece dilanti.

19 juni 2015

Expresionnan haci den e articulo aki no necesariamente ta refleha opinion di ArenaPoliti.co