Excelente regalo den cuadro di e 19 aniversario di Stichting Monumentenfonds 

Diahuebs Minister Otmar Oduber tabatin e honor d ta presente hunto cu un cantidad di invitado na e celebracion di e di 19 aniversario di  Stichting Monumentenfonds.
E mandatario a indica cu e instituto aki tabata uno sumamente necesario y a pesar cu e tabatin su retonan na cuminsamento y a pasa den temporadanan basta duro pa loke ta trata e organizacion den su totalidad, sigur den e ultimo 5 añanan aki por mira e avancenan grandi cu ta logrando danki na Monumentenfonds.
Minister Oduber tin casi 2 aña trahando di cerca cu Monumentenfonds den calidad di Minister di Cultura y e por wak un atencion special no solamente e edificionan, e parti tangibel, pero tambe pa e parti intangibel cu ta asina importante. “Un edificio monumental no tin significado si bo no sa e historia su tras, si bo no ta compronde pakico e ta para, e ta simplemente un edificio di bloki cu cement cu no tin e balor agrega. Mi ta kere cu Monumentenfonds a bay hasta un stap mas leu den nan tareanan cu nan tin pa yuda den e proceso di restaura, den e proceso di duna conseho. Nan a bay den e parti educativo y hunto cu UNOCA y Monumentenbureau a bay pa educa comunidad riba e importancia di loke ta trata nos monumentonan, nos herencia cultural”.
E mandatario a indica cu den e ultimo añanan hopi ta e edificionan monumental cu ta hayando of cu ta bay haya atencion. Entre nan por menciona Stadhuis, Zoutmanstraat, Algemene Rekenkamer, Vuurtoren, Nicolaas Store, Uncle Louis Store y otronan cu ta den proceso pa wordo adkiri manera ta Papiamento Restaurant den Wilhelminastraat.
Un regalo cu a bin net pa celebra e 19 aña di Monumentenfonds ta e conseho cu Minister hunto cu Ministerio di Cultura na Hulanda a pidi for di Hulanda pa mira con ta bay haci nos Monumentenraad, pa dune un rol mas promintente den comunidad pa por sigura cu e monumentonan priva (cu no ta di gobierno) por wordo poni riba e lista di proteccion, algo cu te na e momentonan aki no a logra. Awor cu e conseho ricibi, den e simannan nos dilanti Minister lo reuni cu Monumentenraad pa por restructura esaki y asina e sosode lo por cuminsa mira e lista di riba 300 edificio cu ta wordo considera monumento protehi, esaki banda di e sitionan arkeologio cu tambe ta wordo considera como monumento. “Cu e cambionan cu nos ta bay haci den e maneho pa loke ta trata monumentonan na Aruba, bo ta bay cuminsa haya cu edificionan priva ta wordo proteha, ta wordo registra pa por cuminsa preserva mas y mas tur e monumentonan aki cu ta parti di nos historia, parti di loke nos ta para pe y tambe di nos cultura”, Minister Otmar Oduber a indica.
Anne Witsenburg, directora di Monumentenfonds, mescos cu tur demas presente a mustra hopi contento y satisfecho cu e anuncio cu e mandatario a haci pa loke ta proteccion di tur nos edificionan monumental y sitionan arkeologio.

Expresionnan haci den e articulo aki no necesariamente ta refleha opinion di ArenaPoliti.co