Ministerio di Turismo: E cadena hotelero Occidental ta conoce propetario nobo
Minister di Turismo a reuni cu e gerencia di Occidental Aruba pa haya un mihor bista di e ultimo desaroyo di e compra di e cadena hotelero aki. Ta asina cu e compania Barceló a cumpra accionan minoritario algun luna pasa for di e cadena Occidental, y den e simannan tras di lomba a dicidi di cumpra Occidental por completo. Cu e compra aki ta inclui automaticamente e propiedad situa riba nos isla.
E compania Barceló ta un compania fuerte cu tin mas di 100 hotel na mas di 16 pais rond mundo y awor e lo por agrega Aruba den su lista.
Durante e reunion Minister Oduber a enfatisa riba e importancia pa mantene e palabracionnan cu tin riba e tema di all inclusive. Gobierno di Aruba ta para firme riba e pensamento di limita e cantidad di all inclusive na Aruba di cual e negociacion aki no ta scapa di dije. Tambe a enfoca riba e inversionnan cu e Hotel aki lo conoce cu e cambio di doño. E mandatario encarga cu Turismo di Aruba a enfatisa riba e hecho cu si tin plan pa expansion di e hotel cu esaki mester ta bou di un maneho EP y lo no acepta mas camber all inclusive. Sr. Oduber hasta a dialoga riba e posibilidad di baha e cantidad di cambernan all inclusive actual na Occidental, pa yega mas liher na e balansa cu ta buscando.
Occidental lo conoce un ampliacion den nan Royal Club, tin riba plan pa actualisa e bañonan di e North Tower y dentro di un aña e South Tower tambe lo haya su debido atencion. Intencion ta pa hisa e calidad di e propiedad pa cuadra cu e standard eleva di Producto Aruba.
Sr. Lorenzo Rubio Gerente General di Occidental Aruba a keda satisfecho cu e reunion unda a intercambia e posibilidadnan pa e cadena hotelero Barceló aki na Aruba.
Mey mey di luna di juli e alto ehecutivonan di Barceló lo ta di bishita den nos region y cu tur posibilidad di bishita nos isla pa inspecciona nan propiedad y bishita Minister Otmar Oduber.
Expresionnan haci den e articulo aki no necesariamente ta refleha opinion di ArenaPoliti.co