Diahuebs anochi a tuma lugar e prome anochi di e Aruba Music Summer Festival, un anochi cu artistanan local y Minister Otmar Oduber ta indica cu e festival aki cu ta conta cu presencia tambe di artistanan di renombre internacional tabata e ingrediente cu tabata falta.

Minister Oduber a bisa cu Aruba tin hopi evento cu a purba di haci un exito y cu nos isla semper a cana dilanti manera por ehempel e Aruba Jazz & Latin di 20 pa 25 aña pasa ta un ehempel den e region. Asina a sigui cana dilanti y a bin cu un Film Festival, un Fashion Week y un Electric Festival cu e aña aki lo ta den su di 3 edicion. Algun di e eventonan aki a wordo evalua y no tabata conveniente pa continua, otronan a tuma un pausa y ta continua awor manera ta e Film Festival y awor ta bin cu e festival aki cu ta enfoca riba e mercado Latino.

Semper a bisa cu kier hacie, pero cu si ta hacie mester wordo haci di un categoria hopi halto unda cu tin artistanan di renombre cu ta hala atencion.

“Mi ta hopi contento te awor pa cu e prensa cu ta na Aruba na e momentonan aki cu ta dunando ‘exposure’, tambe e ‘exposure’ cu artistanan manera Pitbull, Carlos Vives, Nicky Jam y otronan ta dunando riba nan social media. Mi ta kere cu e balor agrega cu nos ta bay haya di e mercadeo, e PR cu ta tumando lugar ta hopi grandi”, Minister Otmar Oduber a declara.

Tambe el a bisa cu e reservacionnan cu ta tumando lugar online di diferente parti mundo manera ta Chile, Argentina, Colombia, Venezuela, Inglatera, Panama, Brazil, Ecuador, Corsow, Sint Maarten y otronan ta un muestra cu ta bay cumpli cu e exigencianan cu tin. Tur cos ta indica cu lo surpasa e cantidad di 2 mil bishitante cu lo ta na Aruba specificamente pa e evento aki. 

Expresionnan haci den e articulo aki no necesariamente ta refleha opinion di ArenaPoliti.co