Apesar cu Gobierno a demostra su posicion fuerte relacion entre partnernan a keda intacto 

Confirmacion di e benta di Radisson a drenta na momento cu e transaccionan financiero a tuma lugar y na mes momento a haci un peticion por escrito na corte pa retira e caso pendiente. Ta trata aki di e caso entama pa Aruba Growth Fund caminda Gobierno di Aruba, tambe AGA y ATA a uni na e caso, basa riba un buelta cu tabatin den luna di mei pa cu benta di Radisson, entre Carlson Group y e cadena hotelero Riu.

Gobierno na su turno a keda bastante keto, pero a brinda e informacion si cu esaki ta inaceptabel mirando cu tin un maneho cu ta publica y ta conoci na nivel internacional. Un maneho cu ta detaya e hecho cu Aruba ta impone riba e moratorio cu tin, un di dos paragrafo, caminda kier bin cu un ley pa controla, vigila y evita cu ta bin mas tipo di propiedadnan all inclusive den e area di Palm Beach. E maneho aki tin un excepcion pa e area di pariba di brug.

Minister Oduber ta bisa “Nos no a divulga mucho, pero mi tin cu bisa cu durante e ultimo 3 simanan aki, Gobierno a fiha su posicion hopi fuerte, na tur tres partido envolvi. Sin embargo diaranson despues cu a pospone e caso den corte, nos a wordo confirma cu e traspaso lo tuma lugar dia 15 di juli proximo.”  E traspaso ta conta tanto pa e infrastructura como operacion di e propiedad. Na su turno ya caba e ehecutivonan di Hilton Hotel ta na Aruba pa continua cu un sondeo cu tabata tumando lugar mirando cu nan lo ta e “brand name” cu ta bay opera e propiedad en cuestion.

“Pa nos como Gobierno, nos ta aprecia, e forma con durante e ultimo simanan aki combersacionan ta tumando lugar entre e tres partidonan cu e oido tambe a wordo duna na e maneho di Gobierno cu tabata uno hopi fuerte.” Sr Oduber ta comenta. Tur partido a firma y distancia di e diferente acuerdonan cu tabatin, tambe a firma acuerdonan pa sigura cu e benta ta tuma lugar e ora na Aruba Growth Fund.

Como cu semper e mandatario a considera e relacion cu e partnernan den e industria uno bon, e kier a publicamente gradici tanto Carlson Group, cu cual tabatin combersacionan desde inicio di e proceso aki y a duna oido na un peticion cu hopi urgencia cu a wordo haci na nan. Na Riu Group, representa pa alto ehecutivonan di region cu tabata presente na Aruba, unda Minister Oduber a combersa tambe cu Carmen Riu. Naturalmente tambe kier a gradici Aruba Growth Fund cu ta un grupo di inversionistanan local, y den e caso aki, hunto cu fondonan externo a percura pa financiamento di esaki y cu por a yega na un acuerdo unda awor aki Hilton lo bira un resort na Aruba, opera pa un di e categorianan di 5 strea di e candena hotelero cu tabata asina necesario pa nos isla. E bon den e proceso aki sin embargo ta cu Hilton Hotel mes ta un inversionista den e proyecto, e ta un partner den e proyecto pues contrario na normalmente cu ta dijes bin opera den e caso aki ta bay inverti tambe, nan ta pone financiamento den e proyecto cu naturalmente ta haciele uno mas viabel, uno mas solido. Permanencia pa e resort ta poni pa un largo tempo.

Minister ta sigui bisa “Mi ta kere e caso aki ta un muestra cu bo por diferencia di opinion cu bo partnernan, pero ora un Gobierno pone padilanti y structuralmente, mustra riba e hecho cu ba traha pa prepara leynan, comprension por bin di tur banda y den e caso aki ningun partido ta sali perdi. Tur a compronde e magnitud di e impacto di e interes general di Pais Aruba y esey a pone cu despues di basta incertidumbre por a confirma cu e acuerdo aki ta firma.”

Aruba Growth Fund ta mantene e casino ta mantene tur hende na trabou. ta papia di inversionnan miyonario pa mehora e producto y tambe expande, amplia cu cambernan di e propiedad aki cu den futuro lo keda opera pa un Hilton Grand. 

Expresionnan haci den e articulo aki no necesariamente ta refleha opinion di ArenaPoliti.co